Almatyda «Sergek» beınekameralarynyń sany artady

ALMATY. QazAqparat - Almatynyń Almaly aýdanynda «Sergek» beınekameralarynyń sany 1 069-ǵa deıin artady. Bul týraly Almaty ákimi Erbolat Dosaev málimdedi, dep habarlaıdy QazAqparat tilshisi.

Ákimniń aıtýynsha, shahardyń damýynda qoǵamdyq qaýipsizdikti qamtamasyz etý máselesi óte ózekti. Sol úshin qalada aldyn alý sharalary qolǵa alynýda.

«Bıylǵy jyldyń sońyna deıin aýdanda «Sergek» kameralarynyń sanyn 122-ge arttyryp, 1 069 birlikke deıin jetkizý josparlanýda. Adamdardyń jappaı jınalatyn oryndarǵa qosymsha 541 beınekamera, onyń ishinde 200-i aýlalarda, 118-i saıabaq, alańdarǵa jáne 223 qıylystarǵa ornatylady. Bul rette aıta keteıin, buryn bıýdjet esebinen aýlalarda kameralar ornatylmaǵan bolatyn», - dedi Almaty ákimi.

Eske salaıyq, Almatyda «Sergek» júıesiniń jańa fýnktsııasy iske qosylǵanyn habarlaǵan bolatynbyz.