Almatyda Sentral Eurasian Venture Forum ekinshi ınvestıtsııalyq forýmy ótedi
Uıymdastyrýshylar negizgi taqyryp retinde «Jasandy ıntellekt dáýirindegi adam kapıtaly» baǵytyn tańdap aldy. Sebebi, kez kelgen uıymnyń jetistikke jetýi úshin adam kapıtaly mańyzdy faktor bolyp qala bermek. Adamzat avtomattandyrý men robottandyrý salasynda aıtarlyqtaı tabystarǵa qol jetkizip jatqanymen, aqyldy, daryndy adam jumys ónimdiligin arttyrý jáne básekege qabiletti bolý úshin basty resýrs bolyp qalady. Bul fılosofııa Ortalyq Eýrazııa elderinde qarqyndy damyp kele jatqan startap mádenıetine de tán.
«2023 jyl jasandy ıntellekti damýynda revolıýtsııalyq jyl boldy. Jańa tehnologııalar ómirimizdi ózgertti, biraq ózgerister munymen toqtap qalmaıdy. Sol sebepti venchýrlyq naryq árbir ınvestorǵa bolashaqtyń bir bólshegi bolýǵa jáne Eýrazııa aımaǵyndaǵy qundy oı, startap ıdeıalar men jobalardy júzege asyrýǵa, olardy basqa damyǵan iri naryqtarǵa shyǵarýǵa múmkindik beredi», - dep atap ótti sharanyń uıymdastyrýshysy ári MOST holdınginiń basqarýshy seriktesi Pavel Koktyshev.
«Jasandy ıntellekt tańǵalarlyq ınnovatsııa ákeledi, kókjıekti keńeıtip, jańa múmkindikter ashady. Ol 2030 jylǵa qaraı álemdik jalpy ishki ónimge 15,7 trıllıon dollar tabys retinde qosýy múmkin. Biraq talantty adamdar bolmasa, tehnologııa túkke turǵysyz. Adamı kapıtal jasandy ıntellekt evolıýtsııasyn jasap, oǵan álemdi jaqsy jaqqa ózgertýge tyrysyp baǵatyn aqyl-oı men kásiporyndarǵa qyzmet etýge múmkindik beredi. CEVF forýmynda biz jarqyn ári jemisti bolashaq úshin tehnologııa men talanttardy biriktiremiz», - dep tolyqtyrdy uıymdastyrýshylardyń biri jáne Investbanq negizin qalaýshy Oljas Jıenqul.
Forýmǵa bıznes-perishteler, venchýrlyq ınvestorlar men qorlar, tehnologııalyq startaptar men korporatsııalar, sondaı-aq osy óńirdegi venchýrlyq ındýstrııaǵa qyzyǵýshylyq tanytyp júrgen barlyq adamdar qatysady.
Forým aıasynda Astana Hub halyqaralyq tehnoparki ǵarysh tehnologııalary salasyndaǵy IT-startaptar jarysy - Space Tech Battle ótkizedi. Baıqaýdyń júlde qory – 15 myń AQSh dollary. Oǵan qatysýǵa ótinish 20 mamyrǵa deıin qabyldanady.
2022 jylǵy venchýrlyq forým Almaty qalasynda ótti. Oǵan 800 adam qatysyp, Ortalyq Azııa tehnologııalyq ekojúıesindegi eń aýqymdy is-shara boldy. Forýmǵa qatysqan startap ókilderiniń sózinshe, komandalar shynaıy ınvestorlarmen qarapaıym netvork arqyly 5M dollar ınvestıtsııa tabýǵa múmkindik aldy. Al ınvestorlar qyzyqty startaptar taýyp, ınstıtýtsıonaldyq oıynshylarmen netvorkin keńeıtti.
Forýmǵa Almaty qalasy ákimdigi men Tsıfrlandyrý basqarmasy, AQSh Halyqaralyq damý agenttigi (USAID), Eýropa qaıta qurý jáne damý banki (EBRD), Freedom Broker, Astana Hub halyqaralyq tehnoparki, Tsıfrlyq tólem ındýstrııasynyń álemdik kóshbasshysy Visa kompanııasy, Dúnıejúzilik bank tobynyń múshesi Halyqaralyq Qarjy korporatsııasy (IFC) qoldaý bildirdi.
Central Eurasian Venture Forum Swissôtel Wellness Alatau Almaty qonaqúıi (burynǵy Alataý shıpajaıy) aýmaǵynda ótedi. Mekenjaıy - Taýsamaly kóshesi, 50A. Forýmǵa bılet jáne startap retinde alleıadan oryn alý úshin https://ventureforum.asia/ saıtyna kirý kerek.
