Almatyda «Seniń daýysyń - seniń bolashaǵyń» atty posterler baıqaýynyń jeńimpazdary marapattaldy (FOTO)
ALMATY. QazAqparat - Búgin Almatyda Ortalyq kommýnıkatsııa qyzmetiniń fılıalynda «Seniń daýysyń - seniń bolashaǵyń» atty respýblıkalyq posterler baıqaýynyń jeńimpazdary marapattaldy.
Bul baıqaýdyń maqsaty - qabiletti jandardy 20 naýryzda bolatyn QR Parlamenti Májilisi men barlyq deńgeıdegi máslıhattar depýtattarynyń saılaýyna el azamattaryn kelýge úndeýge arnalǵan posterler jasaýǵa tartý boldy.
Baıqaýǵa barlyǵy 309 adam qatysty. Avtorlardyń kóbisi - 29 jasqa deıingi jastar. Mamandyqtary boıynsha negizinen stýdentter, dızaınerler sýretshiler, órt sóndirýshiler jáne knshiler. Baıqaý jumystary elimizdiń barlyq óńirlerinen kelip tústi. Solardyń ishinde Pavlodar, Aqmola, Jambyl oblystarynan jáne Astana men Almaty qalalarynan kelip túsken jumystar kóp boldy.
Daýys berý qorytyndysy boıynsha baıqaýdyń gran-prı júldesin Astana qalasynyń turǵyny Aıdos Anaev jeńip aldy. Aqtaýlyq Murat Naýryzbaı birinshi orynǵa ıe boldy. Al Taraz memlekettik ýnıversıtetiniń stýdenti Nurseıit Qarabaev pen Almaty turǵyny Saǵıdolla Aqtanov ekinshi oryndy bólisti. Úshinshi oryn Almatylyq Laýl Chýkabaevqa buıyrdy.
«Kórermender kózaıymy júldesi» atalymy boıynsha Pavlodar qalasynyń turǵyndary Qasen Úmitjan men Deına Anastasııa jeńimpaz atandy.
«Bul baıqaý - jastardyń shyǵarmashylyq qabiletin damytýǵa tamasha múmkindik berdi. Ár túrli mazmunda óte kóp jumys kelip tústi. Qazylar alqasynyń múshelerine ásirese avtorlardyń eshqandaı standarttarǵa súıenbeı óz betterimen salǵan avtorlyq jumystary unady», - dedi QR sýretshiler odaǵynyń tóraǵasy Baıtursyn Ómirbekov.
Jeńimpazdar baǵaly syılyqtarmen marapattaldy. Al 50 eń úzdik jumys Almatydaǵy «Baıqońyr» metro beketine kórme retinde qoıylatyn bolady.
