Almatyda senatorlar ushaq apatynan zardap shekkenderdiń halin bildi
ALMATY. QazAqparat – Almatyda QR Parlamenti Senatynyń depýtattary Dınar Núketaeva men Nurtóre Júsip «Bek Air» ushaǵynyń apatynan jaraqat alǵan naýqastardyń halin bilý úshin №4 qalalyq aýrýhanaǵa keldi, dep habarlaıdy QazAqparat tilshisi.
Senatorlar naýqastarmen tildese otyryp, oqıǵanyń mán-jaıyn anyqtaý depýtattardyń baqylaýynda ekendigin jetkizdi.
Qazir jalpy 9 adam Almaty oblysy, Almaty jáne Nur-Sultan qalalarynda emdelip jatyr. Almatynyń №4 aýrýhanasynda 4 zardap shegýshi em-dom qabyldaýda.
Aýrýhanada jatqan naýqastardyń jaǵdaıy ortasha dep baǵalanyp otyr.
Eske salaıyq, 2019 jyldyń 27 jeltoqsanynda «Almaty-Nur-Sultan» reısin oryndamaq bolǵan «Bek Air» áýe kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaq Almaty áýejaıy mańynda apatqa ushyraǵany málim boldy. Saldarynan 12 adam qaza tapty, 69 jolaýshy zardap shekti, onyń 9-y – balalar.
QR Premer-Mınıstri Asqar Mamınniń tóraǵalyǵymen ushaq apatynyń sebepterin tergeý boıynsha Úkimettik komıssııanyń otyrysy ótkizildi. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa jiberildi.
10 qańtar kúni elordada ótken baspasóz máslıhatynda QR Premer-Mınıstriniń orynbasary Roman Sklıar «Bek Air» ushaǵynyń apatqa ushyraý sebebiniń basty nusqasyn atady. Sondaı-aq pılottardyń ózara áńgimesiniń hronologııasyn jarııalady.
