Almatyda sel tasqyny bolǵan aımaqtan 213 540 tekshe metrden astam turmystyq qaldyqtar men laı úıindileri shyǵaryldy
ALMATY. QazAqparat- Almatyda tótenshe jaǵdaı oryn alǵan aımaqta sel saldaryn joıý kezeńi barysynda barlyǵy 297 úı men 155 ýchaske tazartylyp, tıisinshe 213 540 tekshe metrden astam turmystyq qaldyqtar, laı jáne tas úıindileri shyǵaryldy. Bul týraly búgin «Almaty qalasynyń qutqarý qyzmeti» kásipornynyń baspasóz qyzmetinen habarlady.
«Naýryzbaı aýdanynda 2015 jyldyń 2 tamyzyna qaraı, 234 úı men 99 ýchaske tazartylyp, 143 405 tekshe metr laı-tas úıindileri shyǵarylsa, Alataý aýdanynda 12 kóshe, 44 ýchastke jáne 63 úı tazartylyp, 58 065 tekshe metr, al Áýezov aýdanynda 12 ýchaskeden 12 079 tekshe metrden astam turmystyq qaldyqtar, laı jáne tas úıindileri shyǵaryldy», - delingen málimdemede.
Qaraǵaıly ózeni sý arnasynyń 7 shaqyrymdyq jeri zaqymdalǵan bolatyn. Qazir sonyń 4 shaqyrymnan astam jeri tazartylyp, qazir jaǵany nyǵaıtý jumystary júrgizilip jatyr. 65 apatty aǵash kesilip, qala syrtyna shyǵaryldy.
«Almaty Jaryq Kompanııasy» AQ elektr sharýashylyǵy qyzmeti 2 tamyzǵa qaraı, elektr qýatynsyz qalǵan 3000 úıdiń 2988-ine elektr jelisin tartty. Endi tek Raıymbek kóshesiniń boıynda ornalasqan 12 úı ǵana ázirge jaryqsyz qalyp otyr. Óıtkeni, ol úılerdiń aýlalary áli tazartylǵan joq.
Sonymen qatar, ázirge Naýryzbaı aýdanynda 1100 úıge sý jelisi áli tartylmady. Ol úshin jelidegi sýdy zerthanalyq tekserýden ótkizý kerek. Tek sodan soń ǵana sý jelisi iske qosylatyn bolady. Ázirge aýyz sý turǵyndarǵa 19 sý tasymaldaıtyn kólikter arqyly jetkizilip jatyr.
Apattyq-qalpyna keltirý jumystary barysynda tabıǵı gazsyz qalǵan 157 tutynýshynyń 110-nynda jeliler qalpyna keltirildi. Zaqymdalǵan gaz jelileri qalpyna keltirilgen soń, qalǵan 41 úıge de gaz jiberiledi.
Sonymen qatar, sanıtarlyq epıdemıologııalyq qyzmet kúni búginge deıin 638 aýlany zalalsyzdandyryp úlgerdi.
Al Almaty qalasmy densaýlyq saqtaý basqarmasy bolsa 1000-nan astam adam turatyn 594 aýlany tekserip, indetke qarsy bakterıofagtyń 2500-den astam dozasyn jáne basqa da dári-dármekterdi turǵyndarǵa taratty.
Aqsaı shatqalynyń joǵary jaǵynda ornalasqan №8 jáne №8a tuıyq kólshikterdiń sý deńgeıin azaıtý maqsatynda uzyndyǵy 200 metrden astam aǵyzý arnalary ornatyldy. Ázirge sý deńgeıiniń kóterilý qaýpi joq.
Jalpy apat aımaǵynda 1000-nan astam erikti jumys istep jatyr.
Sonymen qatar, apattyq-qutqarý jumystaryna aýmaqtyq memlekettik organdardyń, TJ boıynsha komıtettiń, Almaty q. ІІD bólimsheleri, «Almaty qalasynyń qutqarý qyzmeti» kásiporyny, QR ІІM Ulttyq gvardııasy, QR QM Almaty garnızonynyń áskerı bólimsheleri, Azmattyq qorǵanys qyzmeti jáne eriktiler tartylǵan.
Barlyǵy, sel saldaryn joıý jumystaryna 1784 adam men 325 tehnıka jumyldyrylǵan.
