Almatyda sel saldaryn joıý jumystary jalǵasýda - TJD
ALMATY. QazAqparat - Almatyda sel saldaryn joıý jumystary áli de jalǵasýda. 23-shi shilde men 1-shi tamyz aralyǵynda 196 000 tekshe metrden astam turmystyq qaldyqtar, laı jáne tas úıindileri shyǵaryldy.
Bul týraly Almaty qalasy boıynsha Tótenshe jaǵdaılar departamentiniń baspasóz qyzmetinen habarlady.
Qazirgi tańda tótenshe jaǵdaı oryn alǵan aımaqta apattyq-qutqarý jumystaryna aýmaqtyq memlekettik organdardyń, TJ boıynsha komıtettiń, Almaty ІІD bólimsheleri, «Almaty qalasynyń qutqarý qyzmeti» kásiporyny, QR ІІM Ulttyq gvardııasy, QR QM Almaty garnızonynyń áskerı bólimsheleri, Azamattyq qorǵanys qyzmeti jáne eriktiler tartylǵan.
«Qazseldenqorǵaý» Memlekettiń mekemesi Qaraǵaıly ózeniniń sý arnasyn jiti baqylaýǵa alǵan. Ózenniń bógetten tómengi 120 metrlik jeri tazartylyp, bir kópir qalpyna keltirildi. Ekinshisi jóndelip jatyr. Sonymen qatar, bógettiń joǵary jaǵyndaǵa kópirge barar joldar da tazartylý ústinde. Qazir sý deńgeıi qalypty jaǵdaıda. Odan kelip-keter qaýip joq.
Sonymen qatar, №28237-shi áskerı bólimniń jeke quramy «Qazseldenqorǵaý» MM birge Aqsaı shatqalynyń joǵary jaǵyndaǵy №8-shi jáne №8a morendik kólderiniń sýyn tómen qaraı aǵyzý jumystaryn júrgizip jatyr.
23-shi shildeden 1-shi tamyzǵa deıin Іle Alataýynyń sel qaýpi týyndaýy múmkin aımaqtaryna 14 ushý sapary uıymdastyryldy.
Budan ózge, eldimekenderde aýlalar men kóshelerdi tazartaý jumystary odan ári jalǵasýda.
1-shi tamyzǵa deıin turǵyndardan 802 ótinim kelip túsken. Olardyń ishinde 270 ótinim boıynsha tıisti sharalar qoldanyldy.
Sonymen qatar, turǵyndardyń ótinishi boıynsha turǵyn úıler men aýlalardy zalasyzdandyrý jumystary qolǵa alyndy. Qazirgi tańda 2302 sharshy metr jer zalalsyzdandyryldy.
Jalpy, sel saldaran joıý jumystaryna qazirgi tańda 2724 adam men 459 tehnıka jumyldyrylǵan.
