Almatyda sel qaýpin týǵyzatyn kólderdiń deńgeıi 2 metrge tómendedi
ALMATY. QazAqparat - Almatyda sel qaýpin týǵyzatyn kólderdiń deńgeıi 2 metrge tómendedi, dep habarlaıdy QazAqparat tilshisi.
Qalalyq TJD mamandary atqarǵan jumystardyń arqasynda qaýip tóndiretin muzdyq kólderdiń sýy azaıyp keledi.
«Qazseldenqorǵaý» memlekettik mekemesi 9 muzdyq kóldegi sý deńgeıin tómendetýge 30 maýsymnan bastap kiristi.
«Jumystardyń ekinshi kezeńinde 6 kólde 5 sorǵy ornatyldy. Dıametri 300 mm bolatyn sıfon qubyrlary montajdaldy. Osy is-sharalardyń nátıjesinde Aqsaı ózeniniń sol jaq alabyndaǵy № 9, Aqsaı ózeniniń sol jaq alabyndaǵy № 10, Úlken Almaty ózeniniń alabyndaǵy № 13 Bıs (2 sorǵy) jáne Oń Aqsaı ózeniniń alabyndaǵy № 8 muzdaq kólderde sıfondar men 5 sorǵy jumys istep jatyr. № 1 «bıs» Prohodnaıa kólinde sıfon men evakýatsııalyq kanal iske qosyldy. Qalǵan tórt kóldegi sý evakýatsııalyq kanaldar arqyly aǵyp ketedi. Búgingi kúni Oń Aqsaı ózen alabyndaǵy № 4 kól tolyq bosatyldy», - delingen habarlamada.
Mamandardyń málimetinshe, jumys bastalǵaly beri kólderden 1200 myń tekshe metr sý aǵyzyldy. Sonyń arqasynda sý deńgeıi 2 metrge tómendegen.
«8 kóldiń shuńqyrynda muzdyqtardan quıylǵan sýdyń esebimen sý kólemi 1230,3 myń tekshe metr bolsa, onyń aldynda saıda 1398,9 myń tekshe metr sý bolǵan. Muzdyqtardan sekýndyna 600 tekshe metr keledi. Al sorǵylar arqyly 1640 l/s sý aıdalyp jatyr. Jumystar bastalǵaly barlyǵy 1200 myń tekshi metrden astam sý aǵyzylyp, 2 metrge deıin sý deńgeıiniń tómendeýi baıqalýda», - dedi departament mamandary.
Aıta ketý kerek, Almaty taýlarynda barlyǵy 36 kól bolsa, olardyń 17-siniń tasý qaýpi bar. Bıyl 9 kól erekshe qaýip týǵyzyp otyr.
Kólderdiń jaǵdaıyna baqylaý júrgizý úshin «Aqsaı», «Qarǵaly», «Úlken» jáne «Kishi Almaty» ózenderiniń alaptarynda 9 turaqty bıik taýly maýsymdyq beketke qosa taǵy 8-i ashyldy. Barlyq beketter qajetti gıdrometeorologııalyq jabdyqpen, aspaptarmen jáne ÝQT-dıapazondaǵy baılanys quraldarymen qamtylǵan.
