Almatyda sel qaýpi kezeńi aıaqtaldy
ALMATY. QazAqparat - Almaty qalalyq Tótenshe jaǵdaılar departamenti sel qaýipi kezeńi týraly aıtyp berdi, dep habarlaıdy QazAqparat tilshisi.
Qalalyq Tótenshe jaǵdaılar departamentiniń málimetinshe, Almaty qalasynyń mańynda 45 morena kóli ornalasqan, onyń 15-si asa qaýipti. Bıyl Kishi jáne Úlken Almaty, Qarǵaly jáne Aqsaı ózenderiniń bas jaǵynda ornalasqan 7 kól qaýip tóndirdi.
15 maýsymnan bastap 20 qyrkúıekke deıin 7 morena kóliniń sýy azaıtyldy.
Osy aralyqta Qazseldenqorǵaý kúshterimen morena kólderden 5 mln tekshe metrden astam sý aǵyzyldy, ıaǵnı alǵashqydaǵy jalpy kólemi 1,1 mln tekshe metr.
«Atap ótý qajet, muzdyqtardyń erýinen kólder kúndelikti sýǵa tolyp turdy, egerde bul qubylystar bolmaǵan jaǵdaıda kólderdi osy kúnge deıin 5 ret sýdan bosatýǵa bolatyn edi. Sorǵylar men qosymsha ornatylǵan sıfondy qubyrlardyń, sondaı-aq qoldan qazylǵan aryqtardyń kómegimen kólderdegi sýdyń deńgeıi qaýipsiz belgige deıin tómendetildi, ıaǵnı 1-7 metrge deıin túsip, seldiń bolmaýyna septigin tıgizdi»,– dep habarlady Almaty qalasynyń Tótenshe jaǵdaılar departamenti.
2015 jyl men byltyrǵy jyly sel júrgen Qarǵaly ózeniniń basseınindegi №1 kólde sýdy ózdiginen aǵyzyp jiberýge arnalǵan kanal salyndy, nátıjesinde tranzıt kólge aınalyp, Naýryzbaı aýdanynyń turǵyndary úshin sel qaýpi seıildi.
Aldyn alý jumystaryna shamamen 60 adam men 9 arnaıy tehnıka qatysyp, aerovızýaldy baqylaý jáne shalǵaı jerlerge jabdyqtardy jetkizý úshin QR TJM avıatsııasy qoldanyldy.
«Qazirgi tańda muzdyqtardyń erýi toqtap, morenalyq kólder qysqy rejımge aýysýda, sel qaýpi joq»,– dep atap ótti TJD.
Budan bólek, qala turǵyndary men ınfraqurylymdarynyń qaýipsizdigin qamtamasyz etý maqsatynda jergilikti bıýdjet esebinen «Aıýsaı» jáne «Aqsaı» shatqaldarynda eki selge tosqaýyl bógetiniń qurylysyna jobalaý-smetalyq qujattama ázirlendi, búgingi kúni qurylys-montajdaý jumystaryn júzege asyrý úshin qurylys jobalary QR TJM «Qazseldenqorǵaý» MM-ge berildi. Bógetterdiń qurylysy 2021-2023 jyldarǵa josparlanǵan.
