Almatyda segiz mektep salynyp jatyr
ALMATY. QazAqparat – Megapolıste jańa mektepter salynyp, keıbir eski bilim berý uıymynda seısmıkalyq tózimdilik jumystary júrip jatyr. Bul týraly Almatynyń Jaıly qalalyq orta basqarmasynyń basshysy Sapar Nurashev málim etti, dep habarlaıdy QazAqparat tilshisi.
Basqarma basshysynyń aıtýynsha, jyl sońyna deıin 48 áleýmettik nysannyń qurylysyn aıaqtaý josparda. Onyń ishinde 38 nysannyń qurylysy júrip jatyr, al 10 mektepte seısmıkalyq tózimdilik jumystary júrgizilýde.
«Qazirgi ýaqytta 12 600 oqýshyǵa arnalǵan segiz mekteptiń, 17 mektepke arnalǵan qosalqy ǵımarattar men №7 qalalyq aýrýhananyń qurylysy júrip jatyr. Kishi Almaty ózeniniń jaǵalaýyn jáne Jambyl kóshesin Dostyq dańǵylynan Naýryzbaı batyr kóshesine deıin rekonstrýktsııalaý aıaqtalýǵa jaqyn», - dedi spıker.
№7, 40, 45, 54 mektepter men №16, 114, 116, 141 bóbekjaı-balabaqshalarynyń ǵımarattaryn jóndeý jumystary men seısmıkalyq nyǵaıtý jumystary júrgizilýde.
Spıkerdiń aıtýynsha, Almatydaǵy barlyq jańa mektepterdi salýda álemdik standarttar jáne sońǵy jetistikter eskeriledi. Ol qazirgi balalardyń zamanaýı qural-jabdyqtarmen jabdyqtalǵan jańa keńistikte bilim alýǵa qyzyǵýshylyq tanytady dep esepteıdi. Sondyqtan Almatyda jańa tıptegi mektepterdiń qurylys protsesi jalǵasady.
Sonymen qatar, Alataý aýdanynda Tennıs ortalyǵynyń, «Jas-Qanat», «Qulager», «Alataý», «Aınabulaq-2», «Kemel» shaǵyn aýdandarynda dene shynyqtyrý-saýyqtyrý keshenderiniń qurylysyn aıaqtaý kózdelgen.
Budan bólek, bıyl 21 joba iske qosyldy. Mektepter men balabaqshalar kúrdeli jóndeýden ótedi. «Kemel» shaǵyn aýdanynda aýysymyna 200 kelýshige arnalǵan otbasylyq-dárigerlik ambýlatorııa, Balalardyń jedel járdem ortalyǵy, Depo Evolution Park, úısizderge áleýmettik kómek kórsetý ortalyǵy, Memlekettik qýyrshaq teatrynyń jańa ǵımarattary, al Bostandyq aýdanynda tórt kólikke arnalǵan órt sóndirý deposy salynady.
