Almatyda segiz eldiń balýandary bas qosady
ALMATY. QazAqparat - Qazaqstan Táýelsizdiginiń 25 jyldyǵyna arnalǵan kúresten «Eýrazııa Barysy» IV halyqaralyq týrnıri 1 jeltoqsan kúni «Almaty-Arena» jańa sport kesheninde ótedi, dep habarlaıdy «Kazahstanskaıa pravda» gazeti.
«Qazaqstan Barysy» qazaq kúresin damytý qorynyń tóraǵasy Arman Shoraevtyń aıtýynsha, bizdiń ulttyq kúresimizdiń tanymaldyǵy jyldan-jylǵa artýda. Bıylǵy týrnır elimizdiń eń úlken qalasynda, 12 myń adam syıatyn úzdik zamanaýı arenada ótedi. Bul dodany qazaqstandyq telearnalardan bólek, reseılik, túrkııalyq telearnalar da tikeleı efırde kórsetedi.
Doda barysynda otandyq estrada juldyzdarynyń qatysýymen úlken shoý ótedi. Týrnırge Grýzııa, Mońǵolııa, Polsha, Reseı, Tájikstan, Túrkııa, Ózbekstan, Qazaqstan elderinen 8 ulttyq qurama qatysady. Ár komanda tóreshi, bapker jáne 55 keli, 60 keli, 66 keli, 74 keli, 82 keli, 90 keli, 100 keli jáne 100 keliden joǵary salmaq sanattarynda synǵa túsetin segiz balýannan quralǵan.
Jalpy júlde qory 20 mıllıon teńge. Birinshi oryn alǵan komandaǵa 10 mıllıon, ekinshige - alty mıllıon, úshinshige - tórt mıllıon teńge beriledi.
