Almatyda Saıran kóliniń túbin tazartý jumystary bastaldy

ALMATY. QazAqparat - Almaty qalasynyń ekologııa jáne qorshaǵan orta basqarmasynyń mamandary Saıran kóliniń túbin tazartý jumystaryn bastady, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.

Ákimdiktiń málimetinshe, Saıran kóliniń túbinen bólek, jaǵalaýyn laıdan, qamys pen qoqystan mehanıkalyq tazartý jumystary júrgizilýde.

«Buryndary Saıran sý qoımasynyń túbin tazartý jumystary múldem júrmegen. Mehanıkalyq tazalaý jobasy aıasynda tereńdetý, eńisterdi túzeý, batys jaǵalaýdy retteý, jaǵajaıdy tazalaý men sol jaq jaǵalaýdaǵy pırsti jóndeý jumystary qarastyrylǵan. Mehanıkalyq tazartý jumystaryn mamyr aıynyń sońyna deıin aıaqtaý josparlanǵan», - delinedi ákimdik taratqan habarlamada.

Sý qoımasynyń túbin tazartý jumystarynyń jalpy aýmaǵy 162 myń sharshy metrdi quraıdy. Tazartý jumystarymen 35 jumysshy aınalysady.

Ákimdikten habarlaǵandaı, bıyl sáýir aıynda osyǵan uqsas tazartý jumystaryn Áýejaı jáne Qarasý ózenderinde de júrgizý josparlanýda.

Eske salaıyq, Almaty ákimi Erbolat Dosaev bıyl «Saıran» kóliniń túbi tazartylyp, aýmaǵy abattandyrylatynyn aıtqan bolatyn.

Foto: Almaty qalasy ákimdiginiń baspasóz qyzmeti