Almatyda «Saıran» avtovokzaly men ıppodrom tarıhı eskertkishterdiń tizimine engizildi
ALMATY. QazAqparat - «Saıran» avtovokzaly men ıppodrom Almaty qalasynyń tarıhı-mádenı muralar nysandarynyń aldyn ala jasalǵan esebi tizimine engizildi, dep habarlaıdy QazAqparat ákimdiktiń baspasóz qyzmetine silteme jasap.
QR «Tarıhı- mádenı muralar obektilerin qorǵaý jáne paıdalaný týraly» Zańyna sáıkes nysanǵa tarıhı jáne mádenı eskertkish mártebesin berý úshin ol aldyn ala jasalǵan esep tizimine engiziledi.
Nysannyń mártebesi týraly naqtyly sheshim qabyldanǵanǵa deıin osy Zańǵa sáıkes ol tarıhı- mádenı muralar eskertkishterimen birdeı qorǵalady.
Zańǵa sáıkes ony paıdalanýshy eskertkishti qorǵaǵandaı muqııat bolýy tıis. ıAǵnı, ǵımarattyń syrtyn,ishin qaıta jasaýǵa, konstrýktsııalaryn alý, qosalqy qurylys salýǵa, maqsatty paıdalanylýyn jáne aınalasyn ózgertýge tyıym salynady. Ǵımarattyń ishin jóndeý nemese qaıta jasaý úshin ókiletti organnyń kelisimi qajet.
Aıta ketý kerek, buryn Almaty ákimi Baýyrjan Baıbek zańnamaǵa sáıkes «Saıran» avtovokzalyn jergilikti mańyzy bar tarıhı eskertkishter tizimine engizý týraly máseleni qaraýdy tapsyrǵan bolatyn. Keıin menshik ıesi aımaqty damytýdyń aldyn ala jasalǵan tujyrymdamasyn usyndy. Avtovokzaldyń kólik logıstıkasyn tolyq qaıta jasaý jáne onyń aınalasyn sýburqaqtarmen, dámhanalarmen, jasyl jelektermen jáne balalar alańdarymen qosa tolyq abattandyrý josparlanǵan.
Bulardan ózge, Almaty qalasy ákimdiginiń qaýlysy boıynsha «Atakent» AQ arasyndaǵy 23 gektar jerdi ýaqytsha jalǵa berý jónindegi kelisim kúshin joıdy. Keıin «Atakenttiń» basqarýshy kompanııasy jeke menshiktegi 8 gektar jerdi de tegin qaıtarý jóninde mindetteme alǵan edi.
Kórme kesheniniń basshylyǵy «Qala jaıaý júrginshi úshin» tujyrymdamasyna saı onyń aınalasyn abattandyrý jumystaryn odan ári jalǵastyratyn bolady.
