Almatyda saılaý kúni 54 ınvataksı qyzmet etedi

ALMATY. QazAqparat – Almatyda saılaý kúni 54 ınvataksı qyzmet etedi. Bul týraly el prezıdentiniń kezekten tys saılaýyna daıyndyq aıasynda QR Ortalyq saılaý komıssııasy músheleriniń qatysýymen ótken kóshpeli semınar-keńeste aıtyldy, dep habarlaıdy QazAqparat OSK saıtyna silteme jasap.

Almaty qalasy apparaty basshysynyń orynbasary K. Sýhambekovtyń aqparaty boıynsha saılaý kúni qalada 600 ýchaske jumys isteıdi. Saılaýshylar tizimine 1 mln 170 myńnan astam azamat engizilgen. «1315» biryńǵaı nómiri bar qalalyq Sall-ortalyǵy iske qosyldy. Almaty qalasy ákimdiginiń Open Almaty qoǵamdyq qabyldaý saıtynda saılaýshylar tiziminde ózin tekserýge múmkindik beretin servıs ázirlendi. Uqsas qyzmet @almaty_sailau2022_bot Telegram bot arqyly iske qosyldy. Búgingi tańda 70 myńnan astam adam saılaýshylar tiziminde ózderin tekserdi.

Almaty qalasynda saılaý quqyǵy bar múmkindigi shekteýli 43 000-nan astam adam turady, daýys berý kezinde erekshe jaǵdaılar 6 209 adamǵa qajet. Barlyq saılaý ýchaskelerinde múmkindigi shekteýli jandar úshin qoljetimdilik qamtamasyz etilgen. Barlyq saılaý ýchaskeleri birinshi qabattarda ornalasqan, pandýstar men taktıldi kórsetkishter bar. Budan basqa, saılaý ýchaskelerinde jasyryn daýys berýge arnalǵan arnaıy kabınalar, sondaı-aq múmkindigi shekteýli azamattar úshin beıimdelgen formatta monıtory bar kompıýterler kózdelgen. Sondaı-aq, daýys berý kúni 54 ınvataksı tartylady.