Almatyda saılaý komıssııasynyń músheleri taǵaıyndaldy

ALMATY. QazAqparat - Ońtústik astanadaǵy barlyq saılaý ýchaskeleri respýblıkalyq referendýmǵa daıyn. Bul týraly brıfıng barysynda Almaty qalalyq referendým komıssııasynyń tóraǵasy Janna Asanova málim etti, dep habarlaıdy QazAqparat tilshisi.

Spıkerdiń sózinshe, saılaý ýchaskelerindegi daıyndyq jumystary tolyq aıaqtaldy. Saılaý komıssııasynyń músheleri taǵaıyndaldy. Referendým ótetin kúni olar kezekshilikte bolady.

«Buryn saılaý ýchaskelerinde komıssııa quramynda jeti adam bolsa, qazir saılaý ýchaskelerinde tizimge engizilgen saılaýshylardyń sanyna qaraı 5-11 adam komıssııa múshesi bola alady. Almaty saılaý ýchaskelerinde bul ortasha eseppen 7-9 adam. Komıssııa músheleriniń barlyǵy daıyndyqtan ótip, tártipsizdik bola qalǵan jaǵdaıda ony qalaı retteý kerektigin biledi», - dedi Janna Asanova.

Sonymen qatar, brıfıng barysynda jýrnalıster birinshi bolyp daýys bergen azamattarǵa yntalandyrý syılyqtary qarastyrylǵan ba? degen saýal qoıdy.

«Joq. Alaıda, demeýshiler tarapynan saılaýshylarǵa estelik syılyqtar tabystaý bastamasy bolsa, nege bolmasqa. Kásipkerler jármeńke, fotoaımaqtar, kontsertter túrinde mádenı is-sharalar uıymdastyrýy múmkin. Óıtkeni, qazir jaz, demalys ekenin eskerýimiz kerek. Qala kóleminde basqa da túrli sharalar turaqty túrde ótkizilip turady. Biraq munyń referendýmǵa esh qatysy joq. Bul is-sharalarǵa ýchaskelik komıssııalar qatyspaıdy», - dedi spıker.

Buǵan deıin megapolıste 574 ýchaske daıyndalǵany týraly jazǵan bolatynbyz.