Almatyda saıajaılar men alma baǵy órtenip kete jazdady
ALMATY. QazAqparat – Almatyda Bostandyq aýdanynyń taýly aýmaǵynda órt shyqty, dep habarlaıdy QazAqparat tilshisi.
Qalalyq TJD baspasóz qyzmetiniń habarlaýynsha, 15:15-te Ermensaı shaǵyn aýdanynan joǵary, taýdyń batys sileminde qurǵaq shı órtenip jatqany týraly habar túsken.
«Kún jeldi bolǵandyqtan tilsiz jaý taý etegindegi saıajaılar men aýmaǵy 20 gektar alma baǵyn sharpý múmkin edi. Qaýipke baılanysty sol jerge órt sóndirý qyzmeti jiberildi», - dedi TJD baspasóz qyzmetinen.
Órt 16:32 shamasynda aýyzdyqtaldy. Jalyn 0,8 ga aýmaqty sharpyǵan. Abyroı bolǵanda alma baǵy men úılerge órt jetken joq.
Eske sala ketsek, keshe Medeý aýdanyndaǵy Bolaı taýy (Mohnatka) órtengenin jazǵan bolatynbyz.
