Almatyda saıasattanýshylardyń Evrazııalyq kongresi ótýde
ALMATY. 14 naýryz. QazAqparat /Erbol Azanbek/ - Búgin Almatyda saıasattanýshylardyń Birinshi Evrazııalyq kongresi bastaldy. Eki kúnge sozylatyn kongrestiń basty taqyryby - «Postkeńestik tranzıt: trendter, mıfter men bolashaq».
Saıası sarapshylardyń bas qosýynda postkeńestik elderdiń saıası júıesin zerdeleý, daǵdarystan keıingi álemdegi geosaıası jáne geoekonomıkalyq jaǵdaı, Qazaqstannyń EYQU-men áriptestigi taqyryptary talqylanýda.
Uıymdastyrýshylardyń aıtýynsha, KSRO-nyń taraýy - HH ǵasyr tarıhyndaǵy eń aıtýly oqıǵalardyń biri. Odaqtyń qulaýynan soń geosaıası qurylym men álem kartasy ǵana ózgergen joq, sonymen qatar kóptegen elderdegi saıası damýdyń baǵyttary da ózgeriske ushyrady. «Bulardyń ishindegi postkeńestik keńistikte júrip jatqan ózgerister qıyn, birneshe baǵytty. Kóptegen burynǵy KSRO quramyndaǵy elder saıası júıeni qurýdyń ózindik nusqalaryn qalyptastyra bastady. Bulardyń keıbirinde batystyq demokratııanyń úlgisi joq. Osynda jaǵdaı «postkeńestik tranzıt» túsinigin qalyptastyryp otyr. Qazirgi kezde saıası zertteýshiler aldynda burynǵy KSRO elderindegi saıası tranzıttiń túrin, onyń ishki qurylymyn zertteý qıyn bolyp otyr. Sondyqtan kongres dástúrli túrde, jyl saıyn KSRO-nyń ár elinde kezekpen ótkizilip otyrady dep senemiz»,-dedi Qazaqstandyq gýmanıtarlyq-saıası konıýktýra ortalyǵynyń prezıdenti Esenjol Alaıarov.
Kongreske álemniń 27 elinen 150-ge jýyq saıasattanýshy jınalǵan. Olardyń qatarynda Koreıa Respýblıkasy, Polsha, Izraıl, Túrkııa, Frantsııa, Germanııa, Irannyń ókilderi bar. Uıymdastyrýshylardyń aıtýynsha, shara qorytyndysy boıynsha Saıası zertteýler qaýymdastyǵyn qurý kózdelgen.
