Almatyda «Saıahat» avtobeketi mańynan jańa emhana salynady

ALMATY. QazAqparat – Almaty qalasynyń Jetisý aýdanynda jańa emhana salynady. Bul týraly Almaty ákimi Erbolat Dosaevtyń Jetisý aýdanynyń turǵyndarymen kezdesý kezinde aýdan ákimi Gúlnar Kókebaeva aıtty, dep habarlaıdy QazAqparat tilshisi.

Kezdesý barysynda qala turǵyny emhanaǵa jetý qıyn ekenin, sondyqtan jaqyn jerden emhana salyp berýdi surady.

«Biz «Saıahat» jaqta turamyz. Bizdiń bekitilgen №2 emhanaǵa jetý qıyn, sebebi, ol bizden alys jerde ornalasqan. Onyń ústine biz jaqta kóp qart adamdar men kópbalaly otbasylar turady. Sizden emhanany bizge jaqyn aýdanda salyp berýińizdi suraımyn»,- dedi qala turǵyny.

Jetisý aýdanynyń ákimi Gúlnar Kókebaeva aýdanda jańa emhananyń jobalyq-smetalyq qujaty ázirlenip jatqanyn aıtty.

«Biz Sıdorkın, 14 mekenjaıynan ǵımarat satyp aldyq. Jyl sońyna qaraı jobalyq-smetalyq qujatty ázirleý jumystary aıaqtalyp, saraptamadan shyǵady. Kelesi jyly kúrdeli jóndeý jumystaryn bastaǵaly otyrmyz. Múmkin 2024 jyldyń basynda emhana ashamyz», - dedi Jetisý aýdanynyń ákimi Gúlnar Kókebaeva.