Almatyda saıabaqtardyń barlyǵy ýaqytsha jabyldy
ALMATY. QazAqparat – Almaty ákimdigi koronavırýstyń taralýyn boldyrmaý maqsatynda barlyq saıabaqtardy japty, dep habarlaıdy QazAqparat tilshisi.
«Koronavırýstyń budan ári taralýynyń aldyn alý maqsatynda 2020 jyldyń 21 naýryzynan bastap Almaty qalasyndaǵy barlyq ulttyq saıabaqtar ýaqytsha jabylady. Almatylyqtardan karantın kezinde Tuńǵysh Prezıdent saıabaǵyna, Ortalyq mádenıet jáne demalys saıabaǵyna, 28 Panfılovshy parkine, Family Park-ke, Botanıkalyq baqqa, «Qııal álemi» saıabaǵyna, Almaty zoobaǵyna, Alma-arasan jáne ózge de adam kóp jınalatyn oryndarǵa barýdan bas tartýdy suraımyz», - delingen resmı málimdemede.
Eske sala ketsek, budan buryn qala ákimdiginiń sheshimimen Medeý, Shymbulaq, Pıoner, Kóktóbe, sondaı-aq ishki týrızm boıynsha ekskýrsııalardy júzege asyratyn týrıstik uıymdardyń qyzmeti epıdemıologııalyq ahýal turaqtanǵanǵa deıin ýaqytsha toqtatylǵan bolatyn.
Sondaı-aq, Týrızm basqarmasy koronavırýs tirkelgen qaýipti kategorııaly elderge qatynaıtyn jáne sol elderden bizge keletin týrlardy ýaqytsha toqtatýǵa usynys bildirgen bolatyn. COVID-19 budan ári taralýynyń aldyn alý maqsatynda adam kóp jınalatyn oryndardaǵy saqtyq sharalaryn qatań qadaǵalaý týraly nusqaýlyqtar taratyldy.
Eske salaıyq, Almatyda koronavırýs anyqtalǵan 10 oshaq tirkelip, turǵyn úıler karantınge alyndy.
