Almatyda sáýir aıynda vaktsına salatyn 250 pýnkt ashylady

ALMATY. QazAqparat- Almatydaǵy epıdemıologııalyq ahýalǵa arnalǵan onlaın baspasóz konferentsııasynda qala ákimi Baqytjan Saǵyntaev almatylyqtardy jappaı vaktsınalaýdyń qashan bastalatynyn aıtty, dep habarlaıdy QazAqparat tilshisi.

Qala ákiminiń aıtýynsha, sáýir aıynda 250 egý pýnkti ashylady. Onyń ishinde iri saýda oryndarynda da ekpe pýnktteri jumys isteıtin bolady.

«Qoǵamdyq densaýlyq basqarmasy ashylatyn vaktsınalaý pýnktterin qajetti medıtsınalyq jabdyqtarmen jáne mamandarmen qamtamasyz etetin bolady. Al qarjylyq shyǵyndardy esepteýdi Almaty ákimdiginiń strategııa jáne bıýdjet basqarmasy júzege asyrady. Budan bólek, bıznes qaýymdastyq tasymaldaý, saqtaý, úı-jaı berý jáne vaktsınalaý pýnktterin uıymdastyrýǵa tegin qoldaý kórsetedi»,- dedi ákim.

Sonymen qatar, ol koronavırýsqa qarsy jappaı vaktsınalaý júrgizilgen jaǵdaıda, ony juqtyratyn adam sanynyń kúrt azaıatynyn aıtty.

«Jappaı vaktsınalaý qalypty ómir saltyna oralýǵa jáne karantındik shekteýlerdi birtindep jeńildetýge múmkindik beredi. Vaktsına – aýrýdyń aldyn alýdyń eń senimdi ári barynsha tıimdi sharasy, ıaǵnı vaktsına emdemeıdi, qorǵaıdy»,- dep tolyqtyrdy Baqytjan Saǵyntaev.

Aıta keteıik, búginde qalaǵa 21 850 doza vaktsına jetkizildi. Sáýir men mamyr aralyǵynda Almaty vaktsınanyń qosymsha 750 myń dozasyn alady – aıyna 250 myń dozadan.