Almatyda sáýir aıy jańbyrly bolady
ALMATY. QazAqparat – Almaty qalalyq Tótenshe jaǵdaılar departamenti bastyǵynyń orynbasary Arman Baıgelov megopolıste sáýir aıynda aýa raıy qandaı bolatynyn aıtty, dep habarlaıdy QazAqparat tilshisi.
«Aǵymdaǵy jyldyń sáýir aıynda Almatyda aýa temperatýrasy +12 gradýs bolady degen boljam bar, bul normadan 1 gradýsqa joǵary. Jaýyn-shashyn bir aıda normadan 105 mıllımetr asady», – dedi Almaty qalasy TJD bastyǵynyń orynbasary Arman Baıgelov onlaın-brıfıng barysynda.
Sondaı– aq, ol qala aýmaǵynda sý basý qaýpi bar 26 ýchaske baqylaýǵa alynǵanyn aıtty. Onyń ishinde 9 ýchaskedegi qaýip-qater joıyldy. Bul jumystarǵa jalpy somasy 1 mlrd teńge jumsalǵan.
«Bıyl qalǵan 17 ýchaske boıynsha jobalyq-smetalyq qujattama ázirlenip, ony iske asyrý jumystaryn qolǵa alamyz», – deıdi ol.
Úsh jylda qalada 381 shaqyrym aryq jelileri salyndy. 40 shaqyrym ózen arnalary nyǵaıtyldy. Bul jumystar sý tasqynyn úsh esege azaıtýǵa múmkindik berdi.
