Almatyda saýdaǵa shyǵarylatyn dári-dármek qalaı saqtalady
ALMATY. QazAqparat - Almatyda GDP standartyna saı keletin medıkamentterge arnalǵan qoımalar ashylyp jatyr. Osyndaı qoımalardyń birinde bolǵan QazAqparat tilshisi dári-dármektiń qalaı saqtalatynyn óz kózimen kórip qaıtty.
2018 jyldan bastap otandyq dıstrıbıýtorlarǵa GDP halyqaralyq standartyna saı bolý týraly talap qoıyla bastaıdy.
Qazir osyǵan baılanysty salada daıyndyq júrip jatyr.
Jetekshi dıstrıbıýtorlyq kompanııalar atalǵan standartqa saı keletin qoımalardy ashyp úlgerdi.
Tek Almaty óńiriniń ózinde ǵana atalǵan standartqa saı keletin 5 iri qoıma bar. Jaqynda «A» klasty qoıma ashyldy. Munda alǵash ret gravıtatsııalyq stellajdar qoıylyp, konveıerlik jeli qosylǵan.
«Densaýlyq saqtaý mınıstrliginiń osy baǵyttaǵy saıasaty aıqyn. 12 mamyrda Parlament májilisi otyrysynda osy týraly aıtyldy. Bizdiń talaptarymyz oryndalyp jatqanyna qýanyshtymyz. Tutynýshylar úshin - dárini saqtaý, sapasyn joǵaltpaý asa mańyzdy másele. Bul dáriler el emhanalaryna, dárihanalarǵa taratylady. Dári - aıryqsha saqtaý sharttaryn talap etetin erekshe taýar. Eger, bul talaptar oryndalǵan bolsa, em sharasynda áseri tıimdirek bolary sózsiz», - dedi QR Parlament Májilisiniń depýtaty Záýresh Amanjolova.
Qoımada barlyǵy 150 adam jumys jasap otyr. Qalǵan jumys avtomattandyrylǵan. Munda 5 myńnan astam otandyq jáne sheteldik dári-dármek óndirýshilerdiń ónimderi saqtalyp tur. Kúnine myńǵa tarta tapsyrys túsedi. Barlyǵy qoımada 12 myńǵa jýyq dári saqtalatyndaı oryn bar. Qoıma kesheniniń keı bloktarynyń bıiktigi 22 metrge deıin jetedi.
Osyndaı qoımalardyń biri Almaty oblysy Abaı aýylynda ornalasqan. GDP standartyna saı ashylǵan qoıma shalǵaı aýyldardaǵy tutynýshylardy dárimen qamtýǵa arnalǵan.
Munda konveıerlik jeli, energııalyq týattandyrýdyń balama kózderi, 2 tońazytqysh kamerasy bar. Dárini saqtaýda 4 qajetti temperatýralyq rejim bar. Arnaıy termobokstary bar avtokólik dárini shalǵaıdaǵy aýyldarǵa jetkizedi.
