Almatyda saýda úıine «bomba» qoıǵan adam ustaldy
ALMATY. QazAqparat - Almatyda «Sıtıtsentr» saýda úıine «jarylǵysh zat» qoıyldy dep eldi dúrliktirgen er adam ustaldy. Bul týraly qalalyq ІІD baspasóz hatshysy Saltanat Ázirbek habarlady.
Habarlama keshki 6:37-de túsken. Birer mınýttan soń jedel izdestirý qyzmetiniń ókilderi ǵımarattan 310 adamdy shuǵyl túrde qaýipsiz jerge kóshirdi. Jalpy aýmaǵy 12 myń sharshy metrden turatyn 4 qabatty ǵımarattan «Arlan» arnaıy jasaǵynyń saperleri jarylǵysh zatty tappady. Jalǵan habarlama taratqan adam biraz ýaqyttan keıin ustaldy. Ol 1988 jyly týylǵan Almaty turǵyny bolyp shyqty. «Er adam óziniń pıshologııalyq turǵydan deni saý emestigin alǵa tartqan. Bul derek mindetti túrde tekseriletin bolady», - dedi S.Ázirbek. Qazir atalǵan jaǵdaı QR QK 273 babyna sáıkes biryńǵaı sotqa deıingi tergeý isi reestrine tirkeldi. Terrorızm týraly jalǵan habarlama taratqany úshin bul bap boıynsha 6 jylǵa deıingi bas bostandyǵynan aıyrý túrinde qylmystyq jaýapkershilik kózdelgen.
