Almatyda saýda úıinde kúıik shalyp kóz jumǵan kúzetshi áıelge qatysty ákimdik túsinik berdi
ALMATY. QazAqparat - Almaty qalalyq Eńbek ınspetsııasy 45 jastaǵy «Otrıad 001» kúzet agenttiginiń qyzmetkeri Maıra Adaevanyń óliminen soń qaıǵyly jaǵdaıdy tekserý úshin arnaıy komıssııa qurdy, dep habarlaıdy QazAqparat tilshisi.
Komıssııa quramyna eńbek ınspektory, jumys berýshiniń ókilderi, jumyskerler men tapsyrys berýshiler kirdi. Tekserý nátıjesinde maımen jumys jasaıtyn radıator sapasyz ónim emes, zaýytta jasalǵany anyqtaldy. Jylytqysh kúzet agenttiginiń emes, «Arzan» saýda úıiniń balansynda turǵan.
Komıssııa teksere kele Adaevanyń eki táýlik qatar 48 saǵat boıy kezekshilik etti degen aqparatty joqqa shyǵardy. Jumys ýaqytyn esepteý tabelinde marqum aýysymǵa 2018 jyly 20 jáne 23 jeltoqsanda shyqqan. Bul qujatta «Arzan-2» nysan basshysy Sh.Salmanovtyń qoly tur.
Beınebaqylaý kameralaryndaǵy jazbaǵa sáıkes jarylys 21:34 shamasynda bolǵan.
Dúken qyzmetkerleriniń aıtýynsha, aldymen órt dabyly qaǵylǵan. Sol sátte Adaeva dálizge júgirip shyǵyp, kómek suraǵan. Jedel járdem kóligi kelgenshe qyzmetkerler oǵan alǵashqy medıtsınalyq kómek kórsetken.
«Maımen jumys jasaıtyn radıatordyń jarylýynan Maıra Adaeva aýyr jaraqat aldy. Onyń beti men denesiniń 80 paıyz kúıik shaldy. Jedel járdem japa shekken adamdy №4 aýrýhanaǵa jetkizdi. Dárigerler oǵan 2-3 dárejeli kúıik shalǵan degen dıagnoz qoıdy. Ol aýrýhanada 30 jeltoqsanda kóz jumdy», - dedi Eńbek Inspektsııasynan.
«Otrıad 001» kúzet agenttigi qaıǵy jutqan otbasyǵa 790 myń teńge kóleminde qarjylaı kómek bergen.
Sonymen qatar, saqtandyrý kompanııasymen jasalǵan kelisimshartqa sáıkes marqumnyń kámelettik jasqa tolmaǵan qyzyna aı saıyn qarjy bólinip turatyn boldy.
