Almatyda saýda ortalyǵynyń 3-qabatynan qulaǵan bala esin jıdy
ALMATY. QazAqparat - Almatylyq dárigerler «Mart» oıyn-saýyq saýda ortalyǵynda 3 qabattan qulap ketken balanyń densaýlyǵyna qatysty taǵy da málimetter berdi, dep habarlaıdy QazAqparat tilshisi.
Almaty qalasy Jedel medıtsınalyq kómek kórsetý ortalyǵy bas dárigeriniń orynbasary Dinmuhammed Rýzýddınov «Mart» saýda-oıyn saýyq ortalyǵynyń 3- qabatynan 12 qazan kúni qulap ketken balaǵa taǵy bir ota jasalǵanyn jetkizdi.
«Bala aýrýhanaǵa túsken kezde qosarlanǵan jaraqat bolǵanyn habarlaǵanbyz. Ashyq bas mı jaraqaty bolǵandyqtan alǵashqy ota bas súıegine jasaldy da bala koma jaǵdaıynda apparatta jatty. Óıtkeni birneshe kúngi jaǵdaıy aýyr bolǵandyqtan aıaǵyna ota jasalmady. 4 kúnnen keıin bala esin jıǵannan soń, oń aıaǵynyń ortańǵy jiligine ota jasaldy. Qazirgi kezde aıaǵynyń súıekteri jaqsy, bala esin jıdy, sóılep, tamaǵyn iship jatyr. Biraq áli jansaqtaý bóliminde», - dedi Dinmuhammed Rýzýddınov.
Eske sala keteıik, 12 qazan kúni 2 jasar bala «Mart» oıyn-saýyq saýda ortalyǵynyń 3 qabatynan qulap ketken bolatyn.
Dárigerler balaǵa qosarlanǵan jaraqat, ashyq bas mı jaraqaty, ortańǵy jilik synyǵy, keýde, ish perdesiniń soǵylýy sekildi dıagnoz qoıǵan bolatyn. Oqıǵa Túrkisib aýdandyq ІІB qaıǵyly jaǵdaı retinde tirkeýge alynǵan.
