Almatyda Saýda-ekonomıkalyq yqtymaqtastyq jónindegi Qazaqstan-aýǵan úkimetaralyq komıssııanyń otyrysy ótýde

ASTANA. 26 qyrkúıek. QazAqparat - Ortalyq Azııadaǵy kóshbasshylyqtyń mańyzdy róline ıe Qazaqstannyń aýǵan naryǵyna qaraı jyljýy syrtqy ekonomıkalyq saladaǵy bolashaǵy zor jobalardyń júzege asyrylýyna múmkinshilik ashady.

Bul týraly búgin Almatyda ótken saýda-ekonomıkalyq yqtymaqtastyq jónindegi Qazaqstan-aýǵan úkimetaralyq komıssııanyń 5-shi otyrysynda QR Tótenshe jaǵdaılar mınıstri Vladımır Bojko aıtty.

«Qazaqstandyq naryq pen ekonomıkanyń túrli salasyndaǵy mol múmkinshilikter de aýǵanstandyq kásipkerler úshin qyzyǵýshylyq týdyrady. Otyrys barysynda Qazaqstan Respýblıkasy Úkimeti men Aýǵanstan Islam Respýblıkasy Úkimeti arasynda ınvestıtsııany yntalandyrý jáne ózara qorǵaý týraly kelisimge qol qoıylatyn bolady», - dedi ol.

Otyrys aıasynda Almatydaǵy ónerkásiptik jáne aýyl sharýashylyǵy nysandaryna, joǵary oqý oryndaryna barý josparlanǵan.

Qazaqstan tarabynan alqaly jıynǵa Syrtqy ister, Bilim  jáne ǵylym, Ekonomıkalyq damý jáne saýda, Indýstrııa jáne jańa tehnologııalar, Aýyl sharýashylyǵy mınıstrlikteriniń, sonymen qatar iri qazaqstandyq kompanııalardyń ókilderi qatysýda.

Úkimetaralyq komıssııa otyrysy 27 qyrkúıekke deıin jalǵasady.