Almatyda satýshy qyzǵa qaraqshylyq shabýyl jasaǵan qaskóı ustaldy
ALMATY. 7 qazan. QazAqparat /Ádilet Musahaev/ - 22-jasar jigit tal túste qalanyń Jetisý aýdanyndaǵy Ortalyq kıim-keshek bazarynda urlyqqa barǵan, dep málimdeıdi qalalyq ІІD-niń baspasóz qyzmeti.
Qyzylorda oblysynda týyp-ósken urynyń Almatyǵa kelgenine bir aı ǵana ýaqyt bolǵan.
«Qaskóı jigit býtıkterdiń birindegi jas qyzdy baıqap qalady. Ol klıent retinde ishke kirip, qyzdan taýar týraly surastyra bastaıdy. Al jumys babymen alańdap ketken qyzdy zat qoımasyna kúshtep kirgizgen ol ony qylqyndyra bastaǵan. Qaraqshy qyzdan aqshasy bar ámııanin talap etedi. Názik qyz shabýyl jasaýshyǵa baǵynyp, óziniń barlyq túsimin - 330 myń teńgesin, sonymen birge uıaly telefonyn da bere salǵan. Zorǵa degende aman qalǵan boıjetken óte uzaq ýaqyt óz-ózine kele almaǵan. Bul qatigez qaraqshylyq shabýyl týraly aqparat polıtsııaǵa elý mınýt ótkennen keıin baryp qana túsken»,- deıdi aýyr qylmystyń mán-jaıy týraly Almaty qalasy ІІD Krımınaldy polıtsııa basqarmasynyń qaraqshylyq shabýyl men tonaýdy ashý bóliminiń bastyǵy, polıtsııa maıory Janbolat Zııaddın.
Bul ýaqyt aralyǵynda qylmyskerdiń iz jasyryp úlgergenin aıtpasa da túsinikti. Kórshiles býtıkterdiń satýshylarynyń eshqaısysy da kúdikti esh nárse baıqamaǵandaryn aıtyp tergeýge kómektese almaǵan. Bul aralyqta tájirıbeli iz kesýshiler arnaıy operatsııanyń josparyn quryp úlgergen.
«Jedel is-árekettiń nátıjesinde qaraqshy anyqtalyp, ustaldy. Ol Almatynyń Alataý aýdanyndaǵy jaldamaly páterde jasyrynǵan. Qylmysker urlanǵan aqshanyń bir bóligin jumsap ta úlgergen, al qalǵan aqshalaı qarajat alynyp, QR QK 179-babyna sáıkes - qaraqshylyq shabýyl - qylmystyq iske tirkeldi. Sonymen birge, turaqty jumysy joq azamat M. buryn qylmystyq jaýapkershilikke tartylmaǵany belgili boldy»,- dep óz sózin tujyrymdady J.Zııaddın.
