Almatyda saralanǵan tarıf engizilgen soń jolaýshylar sany 28 paıyzǵa artty
ALMATY. QazAqparat - Almatyda búginnen bastap qoǵamdyq kólikterde saralanǵan tarıf engizildi, dep habarlaıdy QazAqparat.
Almaty qalalyq Jolaýshylar tasymaly kóligi jáne avtomobıl joldary basqarmasynyń basshysy Maqsut Isahov alǵashqy kúnniń nátıjelerimen tanystyrdy.
Onyń aıtýynsha, búgin túske deıin «Ońaı» tranzaktsııalary eki eselengen.
«Túski 14:00-de 23 mln teńge jınaldy. Al saralanǵan tarıf engizilmeı turyp ótken seısenbide kúni boıy 26 mln teńge jınalǵan edi. Qoǵamdyq kólikti paıdalanǵan jolaýshylardyń sany 28 paıyzǵa ósti. ıAǵnı, 28 paıyz adamdar kóleńkeden shyqty. Keshke deıin eki ese kóp aqsha jınaımyz degen oıymyz bar», - dedi Maqsut Isahov.
Basqarma basshysy jańa tarıftiń jolaýshylar úshin de qala bıýdjeti úshin de paıdasyn aıtyp ketti.
«Bul tarıfti engizýdegi maqsat bizdiń tasymaldaýshylarǵa jolaýshylarǵa ońaı arqyly tólemderdiń ár túrin usyný, qala mańyndaǵy tasymaldaýshylarǵa ártúrli baǵalardy qoıý bolyp otyr. Dıskont júıesi de ártúrli jeńildikter berýdi kózdeıdi. Máselen 10 ret júrgen adam 80, odan kóp bolsa 75, 70 teńge degen sııaqty. Alǵashqy 60 nemese 90 mınýtta basqa kólikke otyrǵanǵa aqsha alynbaıdy. Bul jolaýshylarǵa kóp túri qyzmet kórsetýdi jeńildetedi», - dedi basqarma basshysy.
Sondaı-aq, avtobýsta aqsha tólemegen jolaýshylar reıd barysynda ustalyp, keıin aqsha tóleımin dep jatsa olarǵa ákimshilik jaza qoldanylmaıdy. Bul jeńildik tamyz-qyrkúıek aılarynda ǵana jumys jasaıtyn bolady.
«Tolyǵymen qoǵamdyq kóliktegi tólem júıesin ózgertýdiń barlyq salasyn júzege asyrýǵa birneshe aı ýaqyt ketedi. Sondyqtan, keler jyldyń basynda atalǵan reformalar túgel júzege asyrylatyn bolady», - dedi M.Isahov.
