Almatyda Sanjar Jandosovtyń 80 jyldyǵyna oraı konferentsııa ótti
Y. Qańtardyń 27-si. QazAqparat /Ádilet Musahaev/ - Qańtarda 29-ynda memlekettik jáne qoǵamdyq kórnekti qaıratker, ǵalym-ekonomıst Sanjar Orazuly Jandosov 80 jasqa tolady.
Osyǵan oraı búgin Almatyda «Sanjar Jandosov fenomeni: bıografııalyq faktilerden som tulǵaǵa» atty konferentsııa ótti, dep habarlaıdy QazAqparat.
Táýelsizdik alaýynyń birinshi kúnderinen bastap S. Jandosov Qazaqstannyń qoǵamdyq ómirine belsendi túrde qatysty. 1990 jyly ol Sharýa qojalyqtarynyń qaýymdastyǵyna prezıdent, al 1992 jyly Qazaqstan kásipkerleri kongresiniń birinshi tóraǵasy bolyp saılanady. Sonymen qatar «Ádilet» respýblıkalyq erikti túrdegi tarıhı-aǵartýshylyq qoǵamyn qurý bastamasyn kóterip, onyń birinshi tóraǵasy bolady. Halyq aldyndaǵy eńbegi jáne respýblıkany damytýdaǵy úlesi úshin «Eńbegi sińgen ekonomıst» ataǵy berildi, Eńbek Qyzyl Tý, «Qurmet Belgisi» ordenderimen, medaldarmen jáne qurmet qaǵazdarymen marapattalǵan.
Shara barysynda S. Jandosovtyń demokratııalyq, gýmanıstik jáne ekonomıkalyq kóptegen kókeıkesti oılary talqylanyp, baıandamalar oqyldy. Sonymen qatar onymen jaqyn aralasqan jandar men týǵan-týystary estelik áńgimeler aıtty. «Sanjardy alǵash Kaspıı teńiziniń jaǵalaýyndaǵy Qulsaryda kórip, tanysqan edim. Odan keıin bizdiń dostyǵymyz birneshe on jyldyqqa jalǵasyn tapty. Ol aqjarqyn, adaldyqty, ádildikti súıetin jan edi», deıdi aqyn Oljas Súleımenov.
Sondaı-aq konferentsııa aıasynda S. Jandosovtyń muraǵat qujattary men fotosýretteriniń kórmesi uıymdastyrylyp, muraǵattyq kınohronıka kadrlary kórsetildi.
Konferentsııa «Ádilet» qazaqstandyq tarıhı-aǵartýshylyq qoǵamy, QR Ortalyq memlekettik muraǵaty jáne «Sandj» zertteý ortalyǵynyń uıymdastyrýymen ótti.
