Almatyda sanıtaızer ornatpaǵan mekeme basshylaryna aıyppul salynady
ALMATY. QazAqparat – Almatyda dezınfektsııalyq quraldar ornatpaǵan kásipkerlerge aıyppul salynady. Bul týraly búgin ákimdikte ótken brıfıng barysynda qala ákiminiń orynbasary Saparbek Tuıaqbaev aıtty, dep habarlaıdy QazAqparat tilshisi.
Ákimniń orynbasary qalada ótetin dezınfektsııalyq sharalar týraly tilge tıek etti.
«Bul jumystar bastalyp ketti. Shtab otyrysynda jappaı sondaı talap qoıyldy. Mektepter men balabaqshalardy, kınoteatrlardy, kontsertterdi ótkizbeýge bolady. Biraq qoǵamdyq kólikti toqtata almaımyz. Jekemenshik bolsyn, memlekettik bolsyn avtoparkterdiń barlyǵyn kúnde kólikterdi zararsyzdandyryp turýǵa buıryq berdik. Eń aldymen avtobýstar men metroda dezınfektsııa sharalaryn jasaý basty shart bolyp otyr», - dedi Saparbek Tuıaqbaev.
Onyń aıtýynsha, barlyq mekemelerde sanıtaızerler ornatýǵa talap qoıylǵan.
«Sanıtaızerler metro, qoǵamdyq oryndarda, aýrýhanalarda, emdeý mekemelerinde qoıylýy shart. Tapshylyq máselesi sheshildi. Tekserý júrgizdik. Keıbir kásipkerler ornatpaǵan. Endi ornatpaǵan kásipkerlerge aıyppul salynady», - dedi S.Tuıaqbaev.
Qala ákiminiń orynbasary munyń aldynda azyq-túlik tapshylyǵy máselesi sheshilgenin aıtqan bolatyn.
Eske sala ketsek buǵan deıin Densaýlyq saqtaý mınıstri Eljan Birtanov Qazaqstannyń eki azamatynan koronavırýs ınfektsııasy tabylǵanyn málim etken edi.
