Almatyda sanıtarlyq-epıdemıologııalyq baqylaý organdarynyń zańsyz áreketteri anyqtaldy

ALMATY. QazAqparat - Almaty qalasynyń prokýratýrasy «Atameken» kásipkerlik palatasynyń qatysýymen tekserý nátıjeleri boıynsha sanıtarlyq-epıdemıologııalyq baqylaý organdarynyń Qazaqstan Respýblıkasynyń Kásipkerlik kodeksiniń talaptaryna sáıkes kelmeıtin uıǵarymdar shyǵarý arqyly kásipkerlerdiń quqyqtaryn buzý faktilerin anyqtady.

Almaty qalalyq prokýratýrasy baspasóz qyzmetiniń habarlaýynsha, Kásipkerlik Kodekstiń 152-1-babynyń 3-tarmaǵyna sáıkes anyqtalǵan zańbuzýshylyqtardy joıý týraly uıǵarymdy oryndaý merzimi ony oryndaýdyń naqty múmkindigine áser etetin mán-jaılarǵa qaramastan 10 kúntizbelik kúnnen kem emes bolýy kerek.

Degenmen, sanıtarlyq-epıdemıologııalyq baqylaý qyzmetkerleri barlyq jerde zańbuzýshylyqtardy joıý merzimin kórsetetin nusqama berip, zańda kózdelgen merzimdi azaıtqan.

Máselen, dámhanalardyń birinde júrgizilgen tekserý qorytyndysy boıynsha kásipkerge uıǵarym shyǵarylyp, onda anyqtalǵan buzýshylyqtardy joıý merzimi zańsyz 2 táýlikpen shektelgen.

Qalanyń sanıtarlyq-epıdemıologııalyq baqylaý organdary kásipkerlerge barlyǵy 265 osyndaı uıǵarym shyǵaryp, onda anyqtalǵan buzýshylyqtardy joıý merzimi zańsyz qysqartylǵan.

«Prokýrorlar tıisti sharalar qabyldap, barlyq zańsyz qaýlylardyń kúshi joıyldy, kináliler tártiptik jaýapqa tartyldy»,-delingen habarlamada.