Almatyda sanıtarlyq dárigerler jappaı testileýden ótip jatyr
ALMATY. QazAqparat - Almatyda burynǵy vıtse- mınıstr Kamaljan Nadyrovpen baılanysta bolǵan sanıtarlyq dárigerler koronavırýsqa jappaı testileýden ótip jatyr, dep habarlaıdy QazAqparat tilshisi.
Qalanyń bas sanıtarlyq dárigeri Jandarbek Bekshınniń aıtýynsha, búgin qalalyq Taýarlar men qyzmetterdiń sapasy men qaýipsizdigin baqylaý departamentiniń qyzmetkerleri test tapsyrdy.
«QR DSM buıryǵymen mınıstrlik qyzmetkerleri óńirlerge jiberilgen bolatyn. Onyń ishinde vıtse-mınıstr qyzmetin atqarǵan Kamaljan Nadyrov Qaraǵandy oblysy arqyly Jambyl, Almaty oblystaryna kelgen. Almatyda bir kún bolǵan. Algorıtm boıynsha onymen baılanysta bolǵan Taýarlar men qyzmetterdiń sapasy men qaýipsizdigin baqylaý departamentiniń barlyq qyzmetkeri testileýden ótti. Nátıjesin kútip otyrmyz», - dedi Jandarbek Bekshın.
Aıta ketý kerek, QR DSM vıtse-mınıstri qyzmetinen bosaǵan kúni Kamaljan Nadyrovta koronavırýs ınfektsıasy bary anyqtaldy.
QR DSM resmı ókili Dıas Ahmetsháriptiń aıtýynsha, qazir onyń jaǵdaıy qanaǵattanarlyq.
