Almatyda sán aptalyǵy óz shymyldyǵyn japty
ALMATY. 1 qarasha. QazAqparat /Názıra Eleýhan/ -Almatyda «Kazakhstan Fashion Week» sán aptalyǵy bolyp ótti.
Aptalyqta elimizdiń jáne shet eldiń dızaınerleri óz kıim úlgilerin kórsetti. Esterińizge sala ketsek, oǵan Túrik elinen Zeınep Erdogan, Ýkraınadan Oleg Skırda, Grýzııadan Ketı Chhıkvadze, Italııadan "Extyn" sán úıi, qazaqstandyq dızaınerlerden - Aıda Kaýmenova, Quralaı Nurqadilova, Aıgúl Qasymova, Saltanat Baımuhamedova, Jadyra Sahıeva, Larııa Jaqambaeva, Kamılla Kýrbanı, Mıhaıl Kravets jáne "SofiAnn" markasyn usynatyn Sofııa men Anna esimdi dızaınerler qatysty.
Sán aptalyǵynyń birinshi kúni óz kollektsııasyn usynǵan Túrik eliniń dızaıneri Zeınep Erdoǵan: «Men Qazaqstanǵa birinshi ret kelip otyrmyn. Qazaqstandyq dızaınerleriniń kıim úlgileri maǵan qatty unady. Ásirese, Larııa Jaqambaeva men Quralaı Nurqadilovanyń kollektsııalary. Túrik elinde toqyma salasy jaqsy damyǵanymen sán aptalyǵy úsh jyldan beri ǵana ótkizilip keledi. Biz de sizderdiń elderińiz sııaqty endi damý ústindemiz. Men bul salaǵa kelgenime 3-4 jyl boldy. Mılan qalasyndaǵy sán akademııasyn bitirdim. Ystambul qalasynda ózimniń kórme zaldarym men fırmalyq dúkenderim bar. Búgingi kúni shoý-bıznes juldyzdaryna kıim úlgilerin daıyndaýmen aınalysyp júrmin. Aldaǵy ýaqyttaǵy maqsatym eksklıýzıvti kıimderimdi Eýropa jáne álemniń barlyq jerine usyný»,- dedi ol.
Ekinshi kórsetilimderde jas qazaqstandyq dızaınerler Kamılla Kýrbanı men Mıhaıl Kravets tuńǵysh ret el nazaryna ózderiniń sándik kıim úlgilerin usyndy.
«Bul sharaǵa qatysýymnyń negizgi maqsaty ózimniń dızaınerlek qoltańbamdy kórsetý. Debıýttik kórsetilim jasaý úshin úsh jyl daıyndaldym. Kıimder negizinen jibek matalarynan tigildi. Kollektsııamnyń dúnıege kelýine qazaqstandyq sýretshi Ábdýkárim Isanyń sýretteri, ásirese «jolbarys» týyndysy yqpal etti. Ol óziniń sýretterimen «Mádenıet álemi jáne óner» dep atalatyn halyqaralyq kórmede altyn medal alǵan bolatyn. Týyndylarynyń unaǵany sonshalyqty men onyń sýretterinen birden bolashaq kollektsııalarymdy kórdim. Endigi josparlarym «Kúz-Qys» kollektsııalaryn jasaý», - dedi Óner akademııasyn támamdaǵan jas dızaıner Kamılla Kýrbanı. Onyń aıtýynsha, sán aptalyqtary ásirese jas dızaınerler úshin óte qajetti shara.
Kamılla Kýrbanıdyń pikirinshe, elimizde sán ındýstrııasy damyp kele jatyr. «Bizdiń elimiz jas sondyqtan onyń bolashaǵy zor dep bilemin. Aldaǵy ýaqytta jas dızaınerlerdiń kóptep shyǵatynyna senimdimin. Bizdiń qazaqstandyq dızaınerlerdiń ózindik erekshelikteri bar, sonysymen álemdik kórsetilimderde sheberlikterimen tań qaldyryp kele jatyr», -dedi ol.
Úshinshi kúngi kórsetilimderdi Saltanat Baımuhamedova, "SofiAnn" markasyn usynatyn Sofııa men Anna esimdi dızaınerler, Aıda Kaýmenova men Oleg Skırda (Ýkraına) aıaqtady.
