Almatyda «Samuryq» Qazaqstan ulttary teatrynyń alǵashqy qoıylymy kórermen nazaryna usynyldy
Spektakl tanymal jazýshy, dramatýrg Dýlat Isabekovtyń pesasy boıynsha qoıylǵan. Lırıkalyq dramadan turatyn qoıylym búgingi zamanǵy máselelerdi fılosofııalyq tereń turǵyda kórsete otyryp, bas keıipkerlerdiń otansúıgishtigin, turyp jatqan jerlerine degen mahabbatyn, Otanyn qurmetteıtindigi jaıynda baıandaıdy. Qoıylymnyń negizgi oıy - bir el- bir taǵdyr, halyqtardyń dostyǵy men birligi.
Qoıylym qazaq jáne orys tilinde qatar júredi. Onda M.Áýezov, Lermontov, uıǵyr, koreı teatrlarynyń ártisteri jáne T. Júrgenov atyndaǵy Óner akademııasynyń stýdentteri oınaıdy, bir sózben aıtqanda keıipkerlerdi ár ulttyń ókilderi somdaıdy.
«Damý ústindegi el bolǵandyqtan, biz de óner salasynda artta qalmaýymyz qajet. Ártister óz aramyzda aqyldasa kele, nege elimizde halyqtar teatryn ashpasqa, elimizdegi 130-dan asa ulttardyń «aýyzbirshilikte» ómir súrip jatqanyn, halyqtar dostyǵyn kórsetpeske dedik. Dúnıejúzinde osy syndy birneshe teatr bar, biraq túrki tildes halyqtar arasynda, Ortalyq Azııada, elimizde osyndaı janrda ashylyp jatqan birinshi teatr. Onyń ereksheligi - qoıylymdar birneshe tilde júretindiginde. Bul teatr memlekettik emes, qoǵamdyq teatr. Sondyqtan, kóbine teatrda búgingi zamanǵy qoǵamdyq ómirdiń damý jolyn kórsetetin qoıylymdar kórsetiletin bolady»,-dedi teatrdyń kórkemdik jetekshisi Arystanbek Muhamedıuly.
