Almatyda samokatshynyń kesirinen mashınıst poıyzdy shuǵyl toqtatýǵa májbúr boldy
ALMATY. QazAqparat – «Mańǵystaý-Almaty» jolaýshylar poıyzynyń mashınısi temirjol boıynda elektrli samokat mingen er adamnyń bolýyna baılanysty quramdy shuǵyl túrde toqtatqan, dep habarlaıdy QazAqparat tilshisi.
Kóliktegi polıtsııa departamentiniń málimetinshe, 15 mamyr saǵat 15:44-te er adam Almaty-1 jáne Almaty-2 stantsııalary arasynda temirjoldy belgilenbegen jerden kesip ótpek bolǵan.
«Jolaýshylar poıyzy 3 mınýtqa toqtatyldy. Qazirgi ýaqytta quqyq buzýshynyń jeke basyn anyqtaý boıynsha jedel-izdestirý is-sharalary júrgizilip jatyr», - dep habarlady kóliktegi polıtsııa departamentiniń baspasóz qyzmeti.
Oqıǵanyń vıdeosy áleýmettik jelide taraldy. Onda temirjoldyń boıynda jalǵa alǵan elektrli samokaty bar er adamnyń mashınıstpen daýlasyp turǵanyn kórýge bolady.
