Almatyda samokat júrgizýshisi tórt jasar balany qaǵyp ketti
ALMATY. QazAqparat - Almatyda samokat júrgizýshisi tórt jasar balany qaǵyp, oqıǵa ornynan qashyp ketti, dep habarlaıdy QazAqparat tilshisi.
Almatyda trotýarda samokat aıdap ketip bara jatqan qyz ben jigit tórt jastaǵy balany qaǵyp, oqıǵa ornynan qashyp ketti.
Vıdeo áleýmettik jelide paıda boldy.
Almaty qalalyq Polıtsııa departamentiniń málimetinshe, oqıǵa 2 mamyr kúni Nazarbaev dańǵyly men Qabanbaı batyr kóshesiniń qıylysynda bolǵan.
Kóp uzamaı polıtsııa kinálini anyqtady. Ol 24 jastaǵy Almaty oblysy Іle aýdanynyń turǵyny bolyp shyqty.
«Er adam kinásin birden moıyndady, ol jaýapkershilikten qorqyp, balany qaǵyp ketken soń qashyp ketkenin aıtty. Samokat júrgizýshisi janynda qyzy bolǵanyn aıtty. Er adamǵa QR ÁQBtK-niń 615-baby 2-bóligi «Jábirlenýshiniń densaýlyǵyna qylmystyq jazalanatyn is-áreket belgileri joq zııan keltirýge ákep soqqan ne materıaldyq zalal keltirgen áreket» boıynsha ákimshilik hattama toltyryldy. Oqıǵanyń mán-jaıy anyqtalyp jatyr», - dedi Almaly aýdandyq polıtsııa basqarmasynyń basshysy Esen Ysqaqov.
