Almatyda samokat júrgizip kele jatqan áıeldi júk kóligi qaǵyp, mert qyldy
ALMATY. QazAqparat – Almatyda elektrondy samokatshyny kólik qaǵyp, mert qyldy. Júrgizýshi oqıǵa ornynan qashyp ketti, dep habarlaıdy QazAqparat tilshisi.
Adam ólimine alyp kelgen jol-kólik oqıǵasy 12 qarashada saǵat 20:35-te Ábish Kekilbaev pen Baıqadamov kósheleriniń qıylysynda boldy.
«Júk kóliginiń júrgizýshisi Á. Kekilbaev kóshesiniń boıymen kele jatyp soltústik baǵytta Baıqadamov kóshesiniń qıylysynda ońǵa burylyp, velosıped jolaǵymen samokat júrgizip kele jatqan 1974 jyly týǵan áıeldi qaǵyp ketti. Áıel alǵan jaraqattarynan oqıǵa ornynda kóz jumdy. Al júrgizýshi oqıǵa ornynan qashyp ketken. Kóp uzamaı polıtsııa qyzmetkerleri ony ustady», - dedi Almaty qalasy boıynsha Polıtsııa departamentiniń tergeý basqarmasynyń bastyǵy Oljas Sháripov.
Derek QRQK 345 babynyń 3 bólimi boıynsha sotqa deıingi tergep-tekserýdiń biryńǵaı tizilimine engizildi. Tıisti saraptamalar taǵaıyndaldy.
