Almatyda sambodan TMD shekarashylary arasynda chempıonat aıaqtaldy
ALMATY. QazAqparat - Shekara áskerleri qolbasshylyǵynyń keńesi qoldaýymen, Shekara qyzmeti jáne «Dınamo» sport qoǵamymen birlese otyryp, sambo kúresinen TMD memleketteriniń shekarashylary arasynda chempıonat óz máresine jetti, dep habarlaıdy QazAqparat tilshisi.
QR UQK Shekara qyzmeti akademııasynyń baspasóz hatshysy Janat Jabyrbekovtiń aıtýynsha, 20-21 qyrkúıek kúnderi ótken shekarashylar jarysyna kórshilerimiz: Reseı, Qyrǵyz Respýblıkasy, QR UQK Shekara qyzmeti, «Ońtústik» jáne «Shyǵys» óńirlik basqarmalaryna qarasty áskerı bólimderden iriktelgen sportshylar men Shekara qyzmeti akademııasynyń komandalary qatysty. Bas-aıaǵy alty komanda palýandary beldesti.
«TMD shekarashylarynyń arasynda bul chempıonattyń jyl saıynǵy salmaǵy artyp keledi. Ony saıysqa qatysýshy komandalar sanynyń artqanynan ǵana emes, boz kilemge shyqqan samboshylardyń ataq dárejesinen de baıqaýǵa bolady. Atap aıtqanda, bıylǵy jarysqa qatysýshylardyń arasynda sambo kúresinen álemniń eki dúrkin chempıony, sport sheberi reseılik Kýrgınıan Edýard, 5 - halyqaralyq sport sheberi, 20 - sport sheberi, 18 - sport sheberine úmitker, 5 - 1 dárejeli sportshylar bar», - dedi Janat Jabyrbekov.
Saıystyń ashylý saltanatynda elimizdiń ánurany oınaldy. Sonymen qatar, qurmetti qonaqtarǵa sóz usynylyp, óz kezeginde olarda jarysqa qatysýshylarǵa sáttilik tiledi. Birinshi bolyp táýelsiz memleketter dostastyǵy, Shekara áskerleri keńesi qolbasshylyǵy tóraǵasynyń orynbasary general-maıor Savenko Vladımır Nıkolaevıchke sóz berilse, odan keıin minberge shyqqan QR UQK Shekara qyzmeti akademııasynyń bastyǵy polkovnık Polıvanov Pavel Konstantınovıch jarysqa qatysýshylardy shyn júrekten quttyqtady.
Sodan keıin sóz alǵan «Dınamo» dene shynyqtyrý - sport qoǵamdyq ortalyq sport keńesi basqarmasynyń bastyǵy otstavkadaǵy polkovnık Knıazev Nıkolaı Dmıtrıevıchte óziniń júrek jardy tilegin jetkizdi.
Segiz salmaq dárejesinde ótkizilgen chempıonatta segiz márte birinshilik tuǵyrynan kóringen Qazaqstan Respýblıkasy Ulttyq qaýipsizdik komıtetine qarasty Shekara qyzmetiniń qurama komandasy qarsylastaryna esh múmkindik qaldyrmady. Jalpy komandalyq esep boıynsha, birinshi oryn aldy. Ekinshi oryn alǵan reseılik samboshylar da namysty qoldan bermedi. Úshinshi orynǵa turaqtaǵan Qyrǵyz Respýblıkasynyń Shekara qyzmeti búgingi jetisikterin mise tutty.
Jekeleı synda myqtylyǵyn dáleldegen sportshylar jóninde aıtar bolsaq, 57 keli salmaq dárejesi boıynsha birinshi oryndy ıelengen reseılik Kononeko Andreı bolsa, 62 keli salmaqta birinshi oryn alǵan Nurımanov Ǵalymjannyń bul rette joly boldy. 68 keli salmaqta aldyna jan salmaǵan Abdramanov Nursultan da áriptesterinen erekshelene bildi. Al 74 keli salmaqta Qýanbaev Meırjannyń mereıi ústem boldy. 82 keli salmaqta Sahan Abdiqasymnyń joly ońynan týdy. 90 keli salmaqta óner kórsetken Shamshıev Saıatta kópshiliktiń kóńilinen shyǵyp bıik tuǵyrynan kórindi.
100 keli salmaqta ese jiberip alǵan Baıbosynov Amangeldi ǵana osy salmaq boıynsha ekinshi oryn aldy. Birinshi oryndy reseılik Baıalıev Movladı qanjyǵasyna baılady. 100 keliden joǵary salmaqta úshinshi orynǵa turaqtaǵan jerlesimiz Mýjýk Artem qola medaldi mise tutty.
Eske sala keteıik, QR UQK Shekara qyzmeti akademııasynyń sport zalynda sambo kúresinen TMD-ǵa múshe memleketter arasynda shekaralyq vedomstvosynyń chempıonaty osydan alty jyl buryn, 2015 jyldyń qazan aıynda ótken edi.
