Almatyda Samal Eslıamova basty rólde oınaǵan «Aıka» fılmi kórsetiledi
ALMATY. QazAqparat - I Halyqaralyq Almaty Film Festival aıasynda Kann kınofestıvaliniń júldesine ıe bolǵan «Aıka» fılmi kórsetiledi, dep habarlaıdy QazAqparat tilshisi.
Qazaqstan halqy kúzde «Aıka» fılminiń sońǵy nusqasyn birinshi bolyp kóre alady.
«Týyndynyń rejısseri Sergeı Dvortsevoı Kann kınofestıvalinde fılmniń jumys nusqasyn kórsetti. Bul - festıvaldyq fılm, sondyqtan kórermen mundaı erekshe dúnıeni kórýge daıyn bolýy kerek. Bul, ádettegideı, popkorn ustap, kóńil kóteretin fılm emes. Kıno Máskeýde turatyn qyrǵyz mıgranttarynyń ómiri týraly. Fılm qoǵamdaǵy mıgranttarǵa degen kózqarasty ózgertý úshin, olardyń ómiri týraly oılaný úshin jasalǵan» - deıdi «Aıka» fılminiń prodıýseri Gúlnar Sársenova.
Atalǵan fılm Qazaqstanda ótetin Almaty Film Festival HKF ashady. 15 qyrkúıekte qazaqstandyqtar arnaıy shaqyrý boıynsha fılmdi kóre alady.
Festıval Almaty Kúni merekesiniń aıasynda ótedi. Almaty Film Festival-di Astana Film Fund Almaty qalasynyń ákimdigimen birlese uıymdastyryp otyr.
Ol «Mádenıetter jaqyndastyǵy» devızimen ótedi. Kınoforým Almatyda kınematografısterdiń halyqaralyq yntymaqtastyǵyn damytýǵa jáne qalaǵa halyqaralyq jobalardy tartýǵa baǵyttalǵan. Bul shara qala ımıdjin elimizdiń mádenı jáne týrıstik ortalyǵy retinde halyqaralyq deńgeıde kóterýge tamasha múmkindik beredi.
Fılm alty jyl túsirilgen. Bıýdjeti - 2,5 mıllıona evro. Bul áleýmettik drama - Reseı, Qazaqstan, Germanııa, Polsha jáne Qytaı elderiniń birlesken ónimi. Qazaqstandyq aktrısa Samal Eslıamova osy fılmdegi róli úshin 2018 jyldyń 19 mamyrynda Kann kınofestıvaliniń «Eń úzdik áıel róli» júldesin jeńip alǵan bolatyn.
