Almatyda salynyp jatqan taǵy bir turǵyn úı kesheniniń qurylysy toqtatylýy múmkin

ALMATY. QazAqparat – Almaly aýdanynyń turǵyndary qalanyń tarıhı ortalyǵyndaǵy qonaqúı ornyna turǵyn úı kesheniniń salynyp jatqanyna shaǵymdandy, dep habarlaıdy QazAqparat tilshisi.

Turǵyndar Almaty ákimi Erbolat Dosaevpen kezdesý barysynda Raıymbek, 172 mekenjaıy boıynsha shaǵyn qonaqúı ornyna úlken turǵyn úı kesheni salynyp jatqanyn málim etti.

«Bizde kólik qoıatyn jer qalǵan joq. Jańadan salynǵaly jatqan kópqabatty úıdiń irgetasynyń shuńqyry bizdiń úıden 8 metr jerde ornalasqan», - dedi aýdan turǵyny.

Ákimniń orynbasary Muhıt Ázirbaev turǵyn úı kesheni «Dıal-Stroı» kompanııasynyń jobasy ekenin, bul qurylysqa ákimdik ruqsat bermegenin jetkizdi. Aıtýynsha, sol mańda taǵy 2 qurylys salýshy joba bastaǵan. Osy oraıda, kvartaldyń (Kırov atyndaǵy zaýyttyń tómengi jaǵy, Raıymbek, Muratbaev pen Seıfýllın kósheleriniń joǵarǵy bóligi) tolyǵymen bas josparǵa sáıkestigi zerttele bastaǵan.

«Qala basshylyǵy qurylysqa ruqsat bermegenin resmı túrde málimdep otyr. Jańa ǵana sizderge búkil kvartal qalanyń bas jospary boıynsha qaralatyny aıtyldy», - dedi Almaty ákimi Erbolat Dosaev.

Ákim jaýapty basqarmalar prokýratýramen birlesip, qurylys alańyn tekseretinine ýáde berdi.

Eske salsaq, Almatynyń Naýryzbaı aýdanyndaǵy zańsyz salynǵan «Jaısan» turǵyn úı kesheni súriletini habarlanǵan.

Sondaı-aq, sot Naýryzbaı aýdanyndaǵy «Qadam» turǵyn úı keshenin súrý jóninde sheshim shyǵardy . Almaty qalasynyń qala qurylysyn baqylaý basqarmasy nysandy tekserip, sáýlet, qalaqurylysy jáne qurylys qyzmeti salasynda birqatar zań buzýshylyqty anyqtaǵan edi.