Almatyda salynyp jatqan dzıýdo keshenine Búkilálemdik Olımpıadalyq dzıýdo akademııasy mártebesi berildi - M. Myqtybekov
ALMATY. QazAqparat - Almatyda dzıýdodan Qazaqstan ulttyq qurama komandasynyń bazasy retinde jańadan salynyp jatqan dzıýdo keshenine Halyqaralyq dzıýdo federatsııasy Búkilálemdik Olımpıadalyq dzıýdo akademııasy mártebesin berdi. Bul týraly búgin «QazAqparat» tilshisine bergen suhbatynda Qazaqstannyń dzıýdo federatsııasynyń birinshi vıtse-prezıdenti Marat Myqtybekov málim etti.
Onyń aıtýynsha, taıaýda Astana qalasynda dzıýdo kúresinen ótken Álem birinshiligi barysynda Halyqaralyq dzıýdo federatsııasynyń prezıdenti Marıýs Vızer dzıýdo akademııasynyń jańa mártebesin maquldap, onyń bolashaqta álemdik deńgeıdegi bazaǵa aınalatyndyǵyn jáne onda iri sporttyq sharalar ótkizilip turatyndyǵyn aıtqan.
«2013 jyldan beri Almatyda Kárken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledjiniń aýmaǵynda salynyp jatqan dzıýdo akademııasy aldaǵy jyldyń kókteminde qoldanysqa beriledi. Qazir qurylys jumystary júrip jatyr. Bul álemdik deńgeıdegi baza bolaıyn dep tur. Onyń 4 jup tatamı tóseletin alyp zalynda bir mezette 200 adamǵa deıin jattyǵa alady. Sonymen qatar, akademııa aýmaǵynda trenajer zaly, 100 adamǵa shaqtalǵan 2 jáne 4 oryndyq jataqhana, 100 adamǵa arnalǵan ashana salynyp jatyr. Sonymen qatar akademııada dáriger kabıneti, basseın, saýna, kıim jýýǵa, kıim útikteýge jáne demalýǵa arnalǵan bólmeler bolady, - dedi M. Myqtybekov.
Sonymen qatar, ol dzıýdo akademııasyn salýǵa shamamen 4,5-5 mln. AQSh dollary jumsalatyndyǵyn jetkizdi.
«Qurylys jumystaryn Qazaqstannyń dzıýdo federatsııasynyń resmı demeýshisi SAT&Company kompanııasy salyp jatyr. Akademııa aýmaǵy 1 gektarǵa jýyqtaıdy. Al akademııa ǵımaratynyń aýmaǵy 4,5-5 myń sharshy metrdi quraıdy. Bolashaqta bul bazada tek Qazaqstannyń ulttyq quramalary ǵana emes, shet eldik ulttyq qurama komandalar da kelip, osy jerde tolyqqandy oqý-jattyǵý jıyndaryn ótkize alady. Bul jerde birlesken oqý-jattyǵý jıyndary da bolady. Odan basqa, shet elderden mamandardy shaqyrtyp, semınarlar uıymdastyramyz. Bul elimizde dıýzdo sportynyń qaryshtap damýyna septigin tıgizedi», - dedi M. Myqtybekov.
