Almatyda «Salyq Zımanov - patrıot, azamat, ǵalym» atty kitap kórmesi ótip jatyr
ALMATY. 18 aqpan. QazAqparat /Ádilet Musahaev/ - Almatydaǵy QR Ulttyq kitaphanasynda kórnekti ǵalym, zańger, qoǵam qaıratkeri, professor, QR UǴA-nyń akademıgi Salyq Zımanovtyń ómiri men qyzmetinen syr shertetin «Salyq Zımanov - patrıot, azamat, ǵalym» atty arnaıy bezendirilgen kitap kórmesi ótýde.
S. Zımanovtyń mereıtoıyna arnalǵan kórme «Otbasy, áskerı ómirbaıan», «Ulttyq-memlekettik qurylys strategi», «Ǵylymı jáne pedagogıkalyq qyzmeti», «Uly adamdar jaıly», «S.Zımanov týraly», «Laıyqty shákirtter» atty alty bólimnen turady.
Birinshi bólimde ǵalymnyń ómiri men qyzmeti jaıly aqparattar, týǵan jeri týraly materıaldar, otbasy, qatardaǵy jaýyngerden gvardııa maıoryna deıingi ósý joly men marapattary jaıly entsıklopedııalyq basylymdar usynylǵan.
Al kelesi bólimde akademıktiń depýtat, zań shyǵarý organdaryndaǵy túrli komıtetterdiń tóraǵasy jáne táýelsiz elimizdiń ıdeology retindegi qyzmetin kórsetetin kitaptary men monografııalary qoıylǵan.
Sondaı-aq kórmede S. Zımanovtyń ataqty bıler Tóle, Qazybek, Áıteke jaıly zertteýleri men uly oıshyl Abaı, Sh.Ýálıhanov, M.Seralın, elimizdiń Tuńǵysh Prezıdenti N.Á. Nazarbaev týraly ǵylymı maqalalary men baıandamalary da oryn alǵan.
