Almatyda «Salamatty Qazaqstan» atty kitap kórmesi ashyldy
ALMATY. QazAqparat - Búgin Almatydaǵy Ulttyq kitaphanada «Salamatty Qazaqstan» atty kitap kórmesi ashyldy. Kórmeniń ashylý rásimine elimizdiń densaýlyq saqtaý salasynyń jetekshi mamandary qatysty.
«Elimizde 2011-2015 jyldarǵa arnalǵan «Salamatty Qazaqstan» atty memlekettik baǵdarlama bar. Biraq ókinishke oraı, ony kóp adam bile de bermeıdi. Búgingi shara osy baǵdarlamany oqyrmandarǵa, stýdentterge keńinen túsindirýge baǵyttalǵan. Óıtkeni biz básekege qabiletti 30 eldiń qataryna enýge umtylyp jatyrmyz. Al mańyzdy mindetti tek densaýlyǵy zor urpaq qana oryndaı alady. Osy turǵydan alyp qaraǵanda, árbir adam óz densaýlyǵyna jaýapty bolýy shart. Halyqtyń densaýlyǵy siz ben bizdiń qolymyzda. Búginde densaýlyq, salamatty ómir salty - tek medıtsınalyq kategorııa emes, ol memlekettik saıasat» - dedi, kórmeniń ashylý saltanatynda ǵalym-oftalmolog, professor, Qazaqstannyń eńbek sińirgen dárigeri Janar Mustafına. Budan keıin densaýlyq saqtaý jáne medıtsına salasynyń jetekshi mamandarynyń qatysýymen dóńgelek ústel uıymdastyryldy. Aıta keteıik, sharada 15 bólim qamtyldy. Oǵan medıtsınanyń ár salasy, sport jáne salamatty ómir salty boıynsha álem halyqtarynyń tilderinde jazylǵan 3000-nan astam kitap qoıyldy. Sonymen qatar shara aıasynda S.Asfendııarov atyndaǵy Qazaq ulttyq medıtsına ýnıversıtetiniń stýdentteri arnaıy aktsııa ótkizdi. Onda qalaǵan adam óz qanynyń tobyn jáne qan qysymynyń deńgeıin bilip, mamandardyń aqyl-keńesin aldy.
