Almatyda saqtandyrý men táýekelderdi basqarýǵa arnalǵan kınofestıval ótti
ALMATY. 12 qarasha. QazAqparat /Erlik Erjanuly/ - Keshe Almatyda saqtandyrý men táýekelderdi basqarýǵa arnalǵan «StrahOFF!» ІІ Qazaqstan kınofestıvali ótti. Ony «Evrazııa» saqtandyrý kompanııasy men Oleg Boretskııdiń kınoklýby uıymdastyrdy.
Qazir qoǵamda álemdik ekonomıkany damytýdyń túrli stsenarııleri talqylanyp jatyr. Atap aıtqanda daǵdarystyń jańa tolqyny, uzaq merzimdi retsessııa jáne ekonomıka ósýiniń tómendeýi men taýarǵa, qyzmetterge degen suranystyń quldyraýyna baılanysty týyndaǵan máseleler. Ekonomıkany damytýdy josparlap otyrǵan qoǵam úshin jáne jalpy kez kelgen salanyń sarapshysy úshin asa kúrdeli jáıt - belgisizdik jaǵdaıy. Biraq, qandaı jaǵdaı bolmasyn bir nárse ózgermeıdi, ol - anaǵurlym qıyn kezeńderge daıyn bolý úshin táýekelderdi basqarý qajettiligi. Búgingi tańda ózekti ekenine qaramastan, táýekelderdi basqarý áli de tutynýshylardyń kópshiligi úshin naqty jumys isteıtin qural emes, jańadan engen termın retinde qalyp otyr. Sondyqtan da bul sharany uıymdastyrýshylar saqtandyrý men táýekelderdi basqarý ereksheligin kıno arqyly qyzyqty etip túsindirip, kásibı tanystyrý bastamasyn óz qolyna alyp otyr. Olardyń sózine súıensek, jyl ótken saıyn tanymaldylyǵyn joǵaltpaıtyn kıno saqtandyrý jáne táýekelderdi basqarý sııaqty kúrdeli, alaıda búgingi kúnniń mańyzdy máselesine tutynýshylardyń nazaryn aýdarta alady.
