Almatyda saqtandyrý kompanııalarynyń qarjysyn jymqyrǵandar sottaldy
ALMATY. QazAqparat - Almatyda Saqtandyrý kompanııalaryn san soqtyryp ketken alaıaqtarǵa qatysty sot úkimi shyqty, dep habarlaıdy QazAqparat tilshisi.
Almaty qalasynyń №2 Medeý aýdandyń sotynda Ý jáne B esimdi turǵyndarǵa qatysty qylmystyq is qaraldy. 2017 jyly Ý jáne B «ASKO» AQ SK, «London-Almaty» AQ SK, «KK ZıMS «Intertıch» AQ, «Amanat» AQ SK ofısterine baryp, Ý-dyń tarapynan senimdi-agent retinde jumysqa qabyldaý týraly ótinish qaldyrǵan. Osydan keıin, atalǵan saqtandyrý kompanııalary saqtandyrý kelisimsharttaryn júrgizý boıynsha deldaldyq qyzmetke Ý-men arada kelisimshart jasasyp, senimhat bergen. Saqtandyrý kompanııalarynyń senimdi agenti atanǵan Ý saqtandyrý blankilerin jáne bazaǵa ený kilt sózderin qolǵa túsirgen.
Qolyna túsken qujattardy ol B-ǵa bergen. Alǵashqy kezde Ý men B agent jumysyn adal atqaryp kelgen. Ár jasaǵan kelisimshartqa 10 paıyzdan paıda kórip otyrǵan. Sodan keıin, 2017 jyldyń 26 sáýirinen bastap, 12 mamyry aralyǵynda sottalýshy Ý «ASKO» AQ saqtandyrý kompanııasyna 1 226 638 teńge, «London-Almaty» AQ-na 3 444 636 teńge, «KK ZıMS «Intertıch» AQ saqtandyrý kompanııasyna 6 949 627 teńge, «Amanat» AQ SK-na 479 968 teńge kólemindegi qarjyny tapsyrmaı, iri kólemde shyǵyn keltirgen. Ekeýi qarajatty teń bólisip aldy degen boljam bar.
Sot úkimimen olar QR QK 190-baby, 4-bóligi, 2-tarmaǵy boıynsha kináli dep tanylyp, jeke múlikteri tárkilene otyryp 5 jylǵa bas bostandyǵynan aıyryldy. Sonymen qatar, olarǵa saqtandyrý kompanııasy salasynda jumys isteýge shekteý qoıyldy.
