Almatyda Saǵadat Nurmaǵambetovti eske alý kúni ótti

ALMATY. QazAqparat – Búgin Almaty qalasynda Qazaqstan Respýblıkasynyń Tuńǵysh Qorǵanys mınıstri, Halyq Qaharmany, Armııa generaly Saǵadat Qojahmetuly Nurmaǵambetovti eske alý sharasy ótti, dep habarlaıdy QazAqparat Desanttyq-shabýyldaý áskerleriniń baspasóz qyzmetine silteme jasap.

«Men ákemdi úlgi tutyp, onyń salǵan sara jolymen júrdim. Eliniń birtýar azamaty bolǵan adamnyń uly bolý – men úshin úlken maqtanysh, abyroı. Ol kisiniń boıyma sińirgen tárbıesi, Otanyn súıýdegi adaldyǵy – men úshin úlken mektep boldy. Men sol mektepten kemeldendim», - deıdi Saǵadat Qojahmetulynyń uly, zapastaǵy general-maıor Talǵat Nurmaǵambetov.

Qarýly kúshterimizdiń qurylýyna jáne aıaqtan tik turýyna ólsheýsiz úles qosqan dara tulǵa osydan 6 jyl buryn – 2013 jyldyń 24 qyrkúıeginde ómirden ozǵan bolatyn.

«Biz barlyǵymyz Qarýly Kúshterimiz qurylǵan sol kúrdeli, qıyn-qystaý kezeńdi jaqsy bilemiz. Ol shynymen óziniń taǵdyryn áskerı qyzmetpen baılanystyrǵan árbir adam úshin úlgi tutar azamat boldy», - dedi qyzmet jolynda birge bolǵan qarýlasy, zapastaǵy general-maıor Almazbek Abdrahmanov.

Іs-sharanyń sońynda batyrdyń turǵan úıindegi eskertkish taqtaǵa gúl shoqtary qoıylyp, áskerı oqý oryndarynyń kýrsanttary men tárbıelenýshileri saltanatty sappen júrip ótti.