Almatyda Saǵadat Nurmaǵambetovke eskertkish ornatyldy

NUR-SULTAN. QazAqparat - QR Qorǵanys mınıstri, general-maıor Nurlan Ermekbaev Keńes Odaǵynyń batyry, Halyq qaharmany, táýelsiz Qazaqstannyń tuńǵysh qorǵanys mınıstri, armııa generaly Saǵadat Nurmaǵambetovke arnalǵan eskertkishtiń saltanatty ashylý rásimine qatysty. Bul týraly mınıstrliktiń baspasóz qyzmetine silteme jasap QazAqparat habarlaıdy.

Іs-sharaǵa Uly Otan soǵysy men Qazaqstan Qarýly Kúshteriniń ardagerleri, Almaty garnızonynyń qolbasshylyǵy men jeke quramy, Almaty qalasy ákiminiń orynbasary, Qazaqstan Respýblıkasy Parlamentiniń depýtattary, aty ańyzǵa aınalǵan armııa generalynyń týysqandary men qyzmettesteri, áskerı JOO-lardyń kýrsanttary, áskerı-patrıottyq klýbtardyń tárbıelenýshileri, áskerı kafedralardyń stýdentteri, sondaı-aq shaqyrylǵan qonaqtar qatysty.

Bıyl 25 mamyrda Keńes Odaǵynyń batyry, Halyq qaharmany, táýelsiz Qazaqstannyń tuńǵysh Qorǵanys mınıstri armııa generaly Saǵadat Nurmaǵambetov tiri bolsa, 95 jasqa tolar edi.

Saǵadat Nurmaǵambetov - ózin tutastaı Otanǵa qyzmet etýge arnaǵan adam. Tuńǵysh Prezıdent Nursultan Nazarbaevtyń jetekshilik etýimen ol qazirgi zamanǵy Qazaqstan Qarýly Kúshteriniń irgetasyn qalady. El úshin qıyn-qystaý kezeńde armııany basqaryp, onyń qalyptasýy men damýyna ólsheýsiz úles qosty. Onyń joǵary bedeli áskerı áleýetti saqtaý men jeke quram arasyndaǵy áskerı tártipti nyǵaıtýǵa septigin tıgizdi.

«Saǵadat Qojahmetuly - memleket tarıhynda «Halyq qaharmany» ataǵyna ıe bolǵan alǵashqy adam. Táýelsiz Qazaqstannyń Qarýly Kúshteri tarıhynda oǵan birinshi bolyp «armııa generaly» joǵary áskerı ataǵy berildi. Bizben armııa generaly Nurmaǵambetovti máńgi este saqtaý boıynsha jumys júrgizilýde. Elimizdiń kóptegen qalalaryndaǵy kóshe ataýlaryna onyń esimi berilgen. Nur-Sultan, Taraz, Gvardeısk qalalarynda, sondaı-aq onyń kindik qany tamǵan Aqkólde oǵan arnalǵan memorıaldar turǵyzyldy. Bul memorıal bolashaq ofıtserlerdiń áskerı iste tyń jetistikterge jetýde jigerlendiredi. Aty ańyzǵa aınalǵan tulǵa, armııa generaly Saǵadat Qojahmetuly Nurmaǵambetov - barlyq qazaqstandyq jaýyngerler úshin únemi úlgi-ónege», - dedi áskerı vedomstvo basshysy.

Óz kezeginde, Saǵadat Qojahmetulynyń nemeresi Saýyq pen qyzmettesi UOS-qa qatysýshy, Almaty oblysynyń qurmetti azamaty, Qazaqstan halqy assambelıasynyń múshesi, áskerı jazýshy, otstavkadaǵy polkovnık Leonıd Gırsh júrekjardy ystyq lebizin bildirdi.