Almatyda «Sadyqov oqýlary» halyqaralyq ǵylymı-teorııalyq konferentsııasy ótti
ALMATY. Qyrkúıektiń 24-i. QazAqparat /Erbol Turymbetov/ - Búgin Almatydaǵy Abaı atyndaǵy Qazaq ulttyq pedagogıkalyq ýnıversıtetinde jyl saıynǵy dástúrli «Sadyqov oqýlary» atty halyqaralyq ǵylymı-teorııalyq konferentsııa bolyp ótti, dep habarlaıdy QazAqparat.
Bıyl ekinshi ret ótkizilip otyrǵan ǵalymdar basqosýyna TMD memleketterinen kelgen kórnekti ǵalymdar, izdenýshiler jáne ǵalym-ustazdyń uly Erkin Toqmuhameduly qatysty. Konferentsııanyń basty maqsaty gýmanıtarlyq ǵylymdardyń ózekti máselelerin talqylap, akademık Toqmuhamed Sadyqovtyń ǵylymǵa sińirgen eńbegin ashyp kórsetýge baǵyttalǵan.
«Men T. Sadyqovpen 1959 jyldan beri stýdent kezimizden birge oqyp, birge qyzmet etken adammyn. Bul kisiniń arqasynda Qazaqstannyń pedagogıka ǵylymdary úlken tabystarǵa jetti. Pedagogıka ǵylymdarynyń doktor, kandıdattary buryn bizde bolmaǵan edi. Keıingi shyqqan ǵalymdardyń barlyǵy osy kisiniń shákirtteri. Búgingideı oqýlardyń jyl saıyn uıymdastyrylýy jastarymyz ǵana emes, memleketimiz úshin de óte mańyzdy», deıdi ped. ǵ. d., professor, akademık Jeńis Soqybaev.
Konferentsııa jumysynda 100-den astam baıandamalar men prezentatsııalar talqylandy. Bul shara «Qazaqstan joǵary mektebiniń qalyptasýy men damýyndaǵy akademık T. Sadyqovtyń róli men qyzmeti», «Gýmanıtarlyq ǵylymdardyń ózekti máseleleri» jáne «Joǵary oqý oryndary men orta mektepterde tarıh pánin oqytý úderisine jańa ınnovatsııalyq tehnologııalardy endirý joldary» sektsııalary boıynsha júrgizildi.
Konferentsııa aıasynda ǵalymnyń ǵylymı eńbekteriniń kórmesi uıymdastyryldy. Qatysýshylar tústen keıin ǵalym-ustazdyń Keńsaıdaǵy zıratynyń basyna baryp quran oqytty.
