Almatyda sabaqtar aıazǵa jel ekpini qosylǵanda ǵana toqtatylady - TJD
ALMATY. QazAqparat - Almaty mektepterinde sabaqtar aıazǵa jel qosylǵan jaǵdaıda ǵana toqtatylady. Bul týraly búgin Almaty qalasy boıynsha TJD-nyń baspasóz qyzmetiniń jetekshisi Sandýǵash Baımuhambetova aıtty, dep habarlaıdy QazAqparat tilshisi.
Sandýǵash Baımuhambetovanyń aıtýynsha, qalalyq TJD qazirgi ýaqytta Bilim departamentimen birlese qyzmet etip otyr. TJD jel ekpini kúsheıgen ýaqytta mektepterde sabaqtardy toqtatý týraly eskertý jiberedi.
«Almatyda Bilim basqarmasynyń málimeti boıynsha - 25 gradýs aıazda sabaqtar toqtatylǵan joq. Bastaýysh synyptardaǵy sabaqtar -25 gradýs aıazǵa jel qosylǵanda, naqtyraq aıtqanda jel ekipini sekýndyna 25, 30 metrge jetkende toqtatylady. Ondaı sheshimdi TJD, qalalyq Bilim basqarmasy men «Qazgıdromet» kompanııasy birlese otyryp shyǵarady. Eskerýler aqparat quraldary, SMS habarlama arqyly joldanady», - dedi Sandýǵash Baımuhambetova.
Almaty qalasy Tótenshe jaǵdaılar departamenti bilim berý mekemeleriniń ǵımarattaryn tekserip shyqqanyn jetkizdi.
Sonymen qatar, mamandar aıaz kúnderi taýǵa shyǵýdan bas tarta turýǵa keńes berdi. QR ІІM TJK Óńirlik jedel qutqarý jasaǵy Biryńǵaı kezekshi-dıspetcherlik qyzmetiniń jetekshisi Sergeı Tolkýnov aıaz kúnderi qaýipsizdik sharalaryn qatań saqtaýdy eskertti.
«Tabıǵatqa, taýǵa shyǵýdan bas tarta turyńyzdar. Eger shyǵa qalǵan jaǵdaıda shatqaldarǵa shyqpańyzdar. Aıazda qar kóshkini bolýy yqtımal. Birge shyqqan joldastaryńyzdy tastamańyzdar. Araq ishýden bas tartý kerek», - dedi ol.
Tótenshelikter qandaı da bir jaǵdaıda qutqarý qyzmetine 112 nómirine habarlasýdy surady.
