Almatyda sabaq oqytýdyń birneshe nusqasy ázirlendi
Bilim basqarma basshysynyń aıtýynsha, Almatyda jańa oqý jyly qatań sanıtarlyq-epıdemıologııalyq talaptardy saqtaı otyryp, qalypty formatta bastalady. Bul rette 287 mektep 300 myńǵa jýyq oqýshyny qabyldaıdy, onyń 30 myńy birinshi synyp oqýshysy. 68 myńnan astam stýdent 82 kolledjde oqýdy bastaıdy.
Mektepke deıingi uıymdar qalypty jumysyna oraldy, qazirgi ýaqytta 860 balabaqsha men shaǵyn ortalyqta 69 myńnan astam bala bar.
Lázzat Jylqybaeva barlyq bilim berý uıymdary Ashyq jobasyna qosylǵanyn jáne qajetti mólsherde jýǵysh, dezınfektsııa jáne antıseptık quraldarmen qamtamasyz etilgenin jetkizdi.
«1 qyrkúıekten bastap bilim berý mekemelerinde sanıtarlyq talaptardyń saqtalýyna turaqty baqylaý júrgiziledi, onyń ishinde temperatýrany ólsheý, vızýaldy tekserý, jeldetý rejımderi, kvarts, ylǵaldy tazalaý jáne basqa da sharalar. Ruqsat etilmegen adamdardyń kirýine tyıym salynady jáne buqaralyq is-sharalar bolmaıdy», - dedi basqarma basshysy.
Spıker qaladaǵy qazirgi epıdemıologııalyq jaǵdaıdy eskere otyryp, oqý protsesi qalaı uıymdastyrylatyny týraly aıtty.
«Almaty «qoıý qyzyl» aımaqta tur. Osyǵan baılanysty, bilim berýdi uıymdastyrýda oqýshylardyń ózdiginen kelýin boldyrmaý jáne balalar arasynda ınfektsııanyń taralý qaýpin azaıtý maqsatynda oqý protsesi bir mezgilde úsh baǵytta júretin bolady. Birinshiden, oqýshylarǵa ata-analarynyń ótinishi negizinde onlaın oqytý uıymdastyrylady. Osylaısha, ata-analarǵa balasyn mektepke berýdi nemese oqýdy qashyqtan jalǵastyrýdy tańdaý quqyǵy beriledi», - dedi L. Jylqybaeva.
Ekinshiden, aralas oqytý kózdelgen. Osy oraıda negizgi oqý pánderi mektepte, qalǵandary - onlaın formatta (mýzyka, kórkem eńbek, ınformatıka, quqyq negizderi, grafıka jáne jobalaý, kásipkerlik jáne bıznes negizderi) oqytylady.
Úshinshiden, oflaın oqytý negizinen 1-5 synyptardy, bitirýshi 9-11 synyp oqýshysyn qamtıdy jáne synyptarda oqýshy sany 25 adamnan aspaıdy. Osylaısha, bilim basqarmasy dástúrli bilim berý formatyna kezeń-kezeńmen kóshýdi qamtamasyz etýdi josparlap otyr.
Spıker búginde muǵalimder men ata-analar arasynda qajetti túsindirý jumystary júrgizilip jatqanyn aıtty.
Barlyq suraqtar boıynsha oqýshylardyń ata-analary mektep ákimshiligine nemese tikeleı bilim basqarmasyna habarlasa alady.