Almatyda sabaq bastalǵaly qansha oqýshy koronavırýs juqtyrǵan

ALMATY. QazAqparat - Almatyda 1 qyrkúıekten beri 2960 mektep oqýshysy koronavırýs juqtyrdy. Bul týraly shahar basshysy Baqytjan Saǵyntaev «Almaty» telearnasyndaǵy tikeleı efır barysynda aıtty, dep habarlaıdy QazAqparat tilshisi.

Koronavırýs aýrýy 263 mektepte tirkeldi. Sonyń ishinde dástúrli bilim alyp júrgender ishinen 1737 jaǵdaı anyqtaldy.

Onlaın formatta oqyp jatqan 1223 oqýshy koronavırýs juqtyrǵan.

«Oqý jyly bastalǵaly beri 2960 oqýshy koronavırýspen aýyrdy. Eger bala aýyryp qalsa, onda synyp eki aptaǵa karantınge ketedi. Alǵashynda aýrý óte kóp tirkeldi. Qazir jaǵdaıdy baqylaýǵa alýǵa tyrysyp jatyrmyz. Soǵan qaramastan ınfektsııa juqtyrǵandar tirkelip jatyr. Balalar ınfektsııany mektepke qaraǵanda úıde kóp juqtyryp jatyr», - dedi Baqytjan Saǵyntaev.

Buǵan deıin Almaty ákimi qala turǵyndaryn vaktsına alýǵa shaqyrǵan edi.